林文龙亲电乐易玲借麦明诗　唔排除向ViuTV借姜涛：会畀钱！

由林文龙主理的亚洲心动娱乐（AMM）出品，戚其义监制，麦明诗与麦子乐主演的新剧《逐流时代》周五（30日）举行拜神仪式，上任副总裁一职逾一年的林文龙自言演员适应能力高，已习惯这个身份转换；他又续指自己要求甚高：“我会好清楚话畀制作团队听我要啲乜，我嘅做事方针系乜，大家都好清楚我系一个好有要求嘅人，唔会允许得过且过。今日完咗记者会编审团队其实可以走，但佢哋同逐个演员讲解剧本，有咩唔明都可以直接联络，我哋做法好Open，所有嘢都可以直接沟通！”

林文龙为开拍《逐流时代》，更特意向TVB高层乐易玲“借将”，借来2019年与无线（TVB）转签一年一骚“绿叶约”的麦明诗（Louisa）及同年获香港小姐亚军的王菲，他指过程甚顺遂：“一啲都唔难，乐小姐非常帮手，打完畀佢两日已经覆咗我，效率好高，要赞下乐小姐。”谈起近来ViuTV的偶像团体MIRROR及姜涛的人气极高，会否也仿效TVB副总经理曾志伟的手法向ViuTV“借将”，林文龙则回应道：“其实都冇话借唔借人，都系正常工作，揾得你都会畀钱，唔系话过嚟帮手但唔畀钱；我哋呢边系Open嘅，TVB、ViuTV、Model Agency、普通制作公司都好，只要系用得着嘅人都会去敲门，当然成唔成事就要再倾。”

林文龙指原本AMM计划年尾会开拍另一套电视剧，同时也在收集剧本，不过疫情反复，资源投放分布仍未肯定，所以现阶段会先集中精力在《逐流时代》身上：“睇下制成品效果点样再作下一步决定，唔会Plan死今年一定要做乜。”

现时网剧为潮流趋势，早前hmvod更将自家制剧集《把砒霜留给自己》卖予Netflix，问起林文龙在《逐流时代》完成制作后会否同样向Netflix出售，他就指要视乎成品质素：“应该就唔会，我都系要睇咗制成品先。”至于会否售予TVB，林文龙同样给予否定答案。谈起近来TVB与ViuTV之间的电视大战打得火热，AMM如何突围而出，林文龙就谦虚指：“我哋系新人要学下嘢，当然TVB有佢嘅长处，ViuTV亦有受欢迎嘅地方，我哋都会参考双方嘅优点，从而令我哋做得更好！”