丘亚葵反击愁爆2蚊逼巴士　重提龙婷Hello Kiss：我不嬲都好小心

丘亚葵今日（24/5）现身尖沙咀出席《致敬词圣卢国沾作品演唱会》记者会。提到继被爆与龙婷在车厢“Hello Kiss”惹风波后，最近又被爆人财两失愁爆逼巴士，再次引起网民关注，丘亚葵就事件接受《香港01》访问时表示：“其实𠮶晚我系去咗一个好正常嘅饮宴，而当晚我系有揸到车。喺个饮宴上我系有饮过酒，而我身边嘅朋友亦都提醒我饮咗酒唔好揸车，仲话畀我知边度有巴士返沙田，就系咁。原来2蚊都系犯罪，而家先知。其实我搭巴士嘅目的，系因为我饮咗酒，先去搭巴士返屋企，但我唔明白点解系咪两蚊就反映个人沦落，又或者悲惨。我就唔知系咪啰，如果系要用呢样嘢去界定我觉得好无奈。（几耐冇搭过巴士？）都好耐，但港铁有时都会搭嘅。（被指人财两失愁爆逼巴士有冇唔开心？）我冇感受，喺娱乐圈黑都可以写到白。”

被问到同龙婷“Hello Kiss”事件发生后，有否受到太太家训“扭耳仔”？丘亚葵表示：“唔讲啦。都过咗去。（会唔会小心啲？）我不嬲都好小心 。（你咁用心搞骚，会唔会冇时间陪太太？）其实都冇乜所谓，都惯咗啦，因为喺呢行都做咗40几年。（经常接触咁多女性，太太会唔会觉得你冇安全感？）如果你呢40年留意我过去嘅嘢呢都明，明白我嘅人。”