张与辰租住凶宅旧楼得200几呎　愈住愈旺唔舍得搬：唔觉屈就

张与辰今日（24/5）现身尖沙咀出席《致敬词圣卢国沾作品演唱会》记者会。对于他早前透露为了专心参加《中年好声音3》歌唱比赛，要推掉所有工作，已连续10个月零收入，损失6位数字。及后被爆出租住英皇道一幢67年有不少㓥房的凶宅旧楼，惹起网上热议。

张与辰就事件接受《香港01》访问时表示：“其实我而家开始接骚，变咗迟啲就会有收入。冇收入呢段日子我系撑得到，因为之前工作都有啲积蓄。虽然呢10个月冇飞过去，但呢段时间我歌系照写，变咗一样卖歌，版权𠮶啲我仲收紧，经济方面我系Ok。（会唔会悭住使？）一定要悭住使，自己比较少使钱，但主要系使喺买衫同买黑胶唱片，而食就比较少，因为要Keep Fit。”

对于租住凶宅旧楼，张与辰表示：“𠮶度租系平，对于外国人嚟讲位置好方便，食嘢买嘢好方便。至于话我住𠮶栋系凶宅旧楼，除咗一手楼，讲真边度冇死过人，佢唔嚟搞我咪得啰。同埋呢个地方都系旺我，成个过程好顺利，咁快又上埋红馆，之前谂住搬，而家谂吓谂吓都系唔搬，哈哈。（面积几大？）得2至3百尺左右。（够唔够空间？）一个人住系足够。（而家有名气会唔会屈就自己？）咁我又唔会咁觉嘅。因为自己觉得住得舒服就可以。不过我系有揾紧新嘅地方。（租金$6000？）冇咁平，太约8至9千蚊。但自己都有尝试揾新嘅地方，想要多啲空间，setup一个自己嘅工作室。（而家住𠮶度系咪隔开一间间嘅房间？）应该系，好似studio house细细，但乜都有晒。”