邵初忆起父亲病逝未能见最后一面一度哽咽：要爱得及时

邵初父亲去年12月圣诞节前夕不敌癌魔逝世，邵初怀着悲痛心情处理完父亲身后事之后，于1月5日在社交平台公布父亲离世噩耗，发长文悼念父亲，网民纷纷留言送上慰问。

今日（19/2）邵初重新出发现身电视城出席无线处境喜剧《爱·回家之开心速递》宣传造势活动。提起父亲的离世，邵初接受《香港01》访问时表示学会接受：“而家只有思念。其实最初爸爸走咗嘅时候，我系接受唔到，嚟唔切反应，因为我从来未试过有咁唔开心，每当谂起佢都会突然系咁喊，系会好伤心。因为爸爸走𠮶朝，系我细佬睇住佢，当我接替我细佬去照顾爸爸个空档时间，佢就突然离开咗我哋，变咗我哋三个系见唔到爸爸最后一面，对我哋系有遗憾。而喺呢段时间，有好多人都有透过短讯揾我，但我都未能及时回复，因为我当时仲调整紧自己嘅情绪同心情，相信失去至亲嘅人系会明白我当时嘅心情。”

邵初透露在去年6月尾时，父亲被发现患上肝癌，而且一直寻求适切的治疗：“因为爸爸年纪都唔细，变咗好多治疗都唔适合佢做，例如全身麻醉都做唔到，当时大家都想尽办法。而我爸爸为人系好乐天，佢唔想自己太辛苦，亦都觉得好多嘢都试过都无憾。”邵初又指：“自己作为子女，讲起对父亲嘅关怀，有一段时间我系自责自己好多嘢都做得唔够，有好多嘢可以再做得好啲，亦都希望自己可以令到佢自豪，但我唔知自己有冇做到，因为原来好多嘢同佢冇沟通过，虽然好多时间喺佢身边，有好多相处同见面，但都冇讲出嚟我系好锡佢，好爱佢同好关心佢。呢件事发生咗之后，除咗生死我好多嘢都睇得好化。我好希望身边嘅人，花多啲时间去陪伴自己嘅家人，同埋多啲对家人表达我爱你，我好挂住你，记住同家人之间嘅爱要及时讲出嚟，千祈唔好到佢哋走咗，先觉得遗憾。”