【致命复活】朱晨丽狂掴郭晋安　出尽力坚打：真系啪啪声！

最近《致命复活》兴起一铺推理瘾，竞猜谁是绑架郭晋安的Final Boss，剧中演员个个都三缄其口，只透露：“去到大结局你咪知！”真系等到颈都长。朱晨丽都不例外，对于同样问题，她都表示：“总之件事就唔止得一个人关事！”真系咁神秘？不过对饰演叶秋的朱晨丽来说，如何演绎得好比起揾终极大佬更高难度！摄影：符祥定化妆： Raymond Yip发型： Steve Shek @ HAiR

朱晨丽今次饰演女强人，为了更加神似，她特地剪去一把长发，变得更加硬朗。搞掂外形，就要搞掂内心戏。今次与3届视帝郭晋安再次合作，朱晨丽仰慕对方之余，又要由爱生恨，心情极其复杂。回想这一切，朱晨丽忆述当时紧张到安仔都feel，“安仔系我一直好欣赏嘅演员，而且佢系视帝，有一场戏要打佢，我就好紧张。但佢就安慰我：‘唔紧要啦，你真系打落嚟啦，借位好流㗎！’结果我就打，真系啪啪声，仲要拍埋分镜，打咗好多下，我都替观众心痛。”

不过，朱晨丽形容与安仔合作，过程好似他们曾拍过的《末代御医》的关系一样。其中谈及有一场吻戏，朱晨丽心感安仔会觉得唔好意思，反过来安慰对方，“我就同安仔讲，我唔系第一次拍吻戏，你放心锡落嚟啦！结果拍出嚟，大家都觉得好靓。”其后她记起有次与安仔闲聊，“我好坦白同佢讲因为工作，要背好多名词，有经常失眠呢个问题，咁啱佢都有相似嘅经历，讲讲下佢开始介绍我用咩床褥会好训啲，又会同我讲边只香薰好用，食咩会好瞓。”安仔如此贴心，又无架子，难怪朱晨丽形容两人有如《末代御医》里的珍妃与御医，“好似帮我把脉咁！”

至今入行5年，对于朱晨丽来说，最想做得愈来愈好的地方，就是广东话要说得再标准一点：“我唔系土生土长，眼见其他演员讲对白讲得咁顺，真系好羡慕！因为做戏好需要一气呵成，有少少唔舒服嘅地方，观众系会睇到，广东话都算系我最大嘅敌人，但我想同佢成为朋友。”所以目前为止，朱晨丽仍然苦练广东话，她笑言没有捷径，唯有标好剧本每一个音，事前提早时间问朋友意见，“皆因观众系我嘅米饭班主，唔想因为语言问题，听到觉得刺耳而失去观众的支持。”朱晨丽今次凭《致命复活》而获得“最佳女配角”提名，问到会否想有奖揸手，她说：“有奖当然开心，但都系平常心，就算拎唔到，都会有好多唔同嘅奖，我会一直向住目标进发。（目标而家好明确？）慢慢嚟啦，做好自己先，但无目标嘅话会好迷失，咁仲点解要留喺度呢？我相信我做嘅一切系值得。”

除此拍戏，朱晨丽最近与友人合资开画廊，向来喜欢艺术的她，原来此举是为了慈善，“我哋3个年龄层分别系20、30、40，好多人做生意以赚钱为目标，之后先做慈善，而我哋系以慈善为目标做生意，将卖出去嘅画嘅钱去帮一啲有需要嘅人，𠮶种满足感真系好大。”醉心艺术的朱晨丽，原来还有一个梦想，就是开芭蕾舞学校，“我一直学芭蕾舞，到过唔同地方去表演，其实有好多回忆，如果真系有机会，想开一间学校，做自己钟意嘅事。”工作排得密密麻麻的朱晨丽，希望你梦想成真啦！

向来有不少绯闻的朱晨丽，早前又被传与叶澍堃细仔叶瀚华交往。她闻言后直接地回应：“我同佢系朋友，唔好断我同佢嘅米路啦！搞到大家如果想追求我或者佢嘅话，因为绯闻都唔够胆啦！哈哈！”提到现时感情状况，朱晨丽坦言：“今年好似胡杏儿同杨怡咁，佢哋本身都唔算早结婚，都系有咗事业，但最后都揾到真命天子，好幸福，咁我都唔需要太心急嘅！”说到尾，朱晨丽没有特定的对象，选择静静地等待合适的对象降临。