使徒行者3｜叶蒨文拍亲热戏紧张到胃痛　直认要求高：喊咗四个钟

凭着TVB处境剧《爱·回家之开心速递》中饰演Candy而大受欢迎的叶蒨文（Sophie），近日首度在台庆剧《使徒行者3》中孭重戏份，饰演保安局副局长千金苏淼淼，同袁伟豪（Ben）有不少亲热戏。可惜在昨晚（15日）播出的一集中，苏淼淼（叶蒨文饰）因为帮徐天堂（袁伟豪饰）调查爸爸苏子安（李国麟饰）受贿洗黑钱的真相，最后事败被对方错手杀死。

“01最赏睇娱乐大奖”即日起至12月23日接受投票喇，答埋简单问题，随时赢最新5G手机12 Pro！

现年28岁的Sophie在2016年参选港姐后入行，凭着“岛大女神”之名而为观众熟悉，虽然过往参演过不少剧集，但多数都是无名的角色，今次是她首度在正剧中有正式演出，但原来这个机会是临阵换角才得来的，加上在剧中与袁伟豪及李国麟有不少对手戏，令她大感紧张：“第一场戏已经要喺袁伟豪面前除衫，我去到现场紧张到胃痛，睇完第一个take觉得好唔满意、好离谱，但都要拍埋落去，离开片场返到屋企我喊咗四个钟。但到播出又觉得自己好傻，其实唔使喊咁耐咁紧张嘅，经过导演同大家演员嘅悉心调教之后都ok嘅，但呢个经历令我觉得自己心理质素比较差啦，可能经验多啲就唔会咁紧张。”

重温精彩演出：

剧中Sophie饰演阿Ben的女朋友，两人更有连场激吻戏，令拍剧经验尚浅的她非常尴尬：“喺我屋企同徐天堂锡锡𠮶part呢，第一个take我唔知点样做，硬晒軚，导演就话‘你哋可唔可以畀多啲Passion呀？’跟住袁伟豪就话‘佢都冇反应嘅’，我话‘导演，要反应？好好，得得，我畀你’，跟住第二个take就放咗去做啰，落足感情去锡佢个嘴呀！同埋我唔知喺萤幕睇要锡到几激先系啱啱好，但第二个take都ok，导演都收货。”

Sophie同阿Ben在剧中接连上演泳池调情戏同激吻戏，讨论度十足，但其实私底下Sophie与同届港姐张宝儿（Bowie）是好朋友，所以她在开拍前都有向对方报备：“𠮶阵时收到剧本知道同佢男朋友有亲热戏，觉得少少怪怪哋，但工作需要，都有同佢报告‘要锡你男朋友，报定先。’（有冇监场？）冇呀，宝儿都大方，佢自己都做呢行，我相信佢应该会更加理解。同埋宝儿知道我今次终于有比较多戏份，主动message我叫我畀心机，放松啲做，叫我加油，我好感动好开心。”

眼大大、笑容甜美的Sophie被视为是“美女笋盘”，今次在《使徒行者3》中的演出更令观众眼前一亮，大赞她有样有身材，但其实Sophie已经有一位圈外男友，而且好理解她的工作：“我男朋友都大方嘅，唔会呷醋，唔知佢内心有冇，但佢表现出嚟冇啰。佢好分得开嘅，知道系做嘢需要，我都好知自己现实中要啲乜嘢，同埋佢都信任我嘅，咁我作为一个女朋友都几好㗎嘛，值得信赖嘅。（感情稳定有冇结婚计划？）冇呀，我都好专注做嘢，而家市道咁差，大家都系谂住揾钱先。”对于被网民激赞有潜力上位，Sophie就表现得好谦虚：“我自己目标系做到最好，走得几远唔系我决定，做好自己先。”