朱智贤爆喊讲偷食人夫原因：觉得自己经验唔够

朱智贤被爆与人夫黎振烨于车厢幽会，今午（29日）朱智贤喺谢东闵陪同下，现身电视城记者会，之后再一齐接受《东张西望》访问，朱智贤喊足全程：“我承认系因为拍剧而导致而家咁，觉得自己经验唔够，演戏经验唔多所以唔搞到今时今日咁，抽离唔到角色，好多谢Brian（谢东闵）喺呢段时间陪住我，因为我知道佢其实承受咗好多，比我更加难受更加痛苦。”

问有否觉得令到家人担心？她说：“我最想同屋企人讲对唔住，好唔想因为我自己嘅事影响到屋企人，我记得我即时Send短讯畀我爹哋，我好惊影响到佢，唔想屋企人畀人讲闲话，我唔想因为我一个人嘅事影响到我身边嘅人，同埋我好想同剧入面嘅演员讲对唔住，仲有监制讲对唔住，因为我嘅唔专业而连累到大家，我以后会做番好啲，希望大家畀个机会我。（会唔会好忟自己犯呢个错失？）我真系好后悔、好内疚，我都接受唔到自己犯呢个错。”

访问期间，朱智贤同谢东闵未有太多交集，但他表示接下来会抽更多时间陪伴对方：“尽量唔使工作嘅时候会陪佢多啲，因为呢段日子都唔系咁易过，可能受到出面好多压力，我希望呢段时间都可以陪佢一齐走过呢个阶段。”