【瞩目配角】罗乐林同太太分房九年不离婚：有啲嘢已经各走极端
在《爱·回家之开心速递》中，罗乐林饰演的大龙生自命风流，拥有四房太太继续拈花惹草。现实中，罗乐林也先后拥有两名太太，他于2011年曾说过已与第二名太太陈宝仪（陈宝珠妹妹）离婚，不过依然过著同居生活。但在今次专访中，罗乐林首次澄清，原来他跟太太并没有离婚，依然同一屋簷下，只是分房生活。
罗乐林已离婚的消息其实已被传开十年，一直被以为是单身的他，突然说出自己并未离婚，连记者也感到惊讶，他说：“其实我而家又想喺度讲一样嘢，出面啲人可能未必知，其实你话有冇离婚，其实系冇，只不过系大家分居啫，分居咗好多年。住埋一齐，分居只不过系第一个地方，不过大家分开咗唔同房好耐，无问题，当然每个人分开咗有大家嘅生活。”
爱情是一件很奇妙的东西，被互相吸引时，能说出无限优点，但当分开的时候，又可以说出对方无数缺点，但罗乐林没有说过陈宝仪半句坏话，分开的原因主要是大家的想法愈来愈不同。“有啲嘢已经各走极端，咁都冇所谓喇，你有你唔同，宗教我觉得冇问题，正常嘅宗教都系导人向善，系咪先？你有你谂法，任何嘢都好，总之我永远，唔啱听都好，我唔搭嘴，咁咪冇嘢啰。初初喺埋一齐一定唔会有呢种情况，永远当对方有咩唔啱你都觉得系啱，对方嘅信仰你都觉得系OK嘅，当大家开始慢慢发觉系有问题喇，各方面思想、谂法、所识嘅朋友都唔同，咁咪唔同啰，咁唔同会令你有咩特别唔想一齐，或者分居，呢样嘢我又谂唔到，总之觉得大家愈嚟愈走极端，咁咪算啰ok，你有你朋友我有我朋友。”
热恋期的盲目是很多人经历过的事，相处久了才发现跟对方诸多不夹，罗乐林陈宝仪于1982年结婚，到2011年宣布分开，俗语也云：“勉强冇幸福”，及早选择分开未必是错，至少两人可以维持良好关系。
但对于普遍的人来说，分开就真的是分开了，刚烈的人也许永远不会见面，即使关系保持良好也未必再常常相见往来，但罗乐林和陈宝仪竟然仍住在同一间屋里，如何相处？其实好像也跟普通夫妻无异，不过罗乐林坚持一个做法：“点解两个人成日嘈呢，你觉得佢有啲嘢唔啱你就去话佢，我嘅嘢唔啱佢又嚟话你，是但一个人去话唔紧要，对另一个人你永远唔出声就咩事都冇，你两个大家各持己见就一定出事。我冇呀，所以我点解可以做到同一屋簷下就系因为，你讲咩都系，ok，唔出声。”
既然能够相处如初，为什么又要选择分开？罗乐林表示不能说出一个确实的原因，但他用两只字令记者感到有点矛塞顿开—“默默”。很多时，所有事都是默默地发生，甚至连我们自己也来不及发现便出现在我们面前，或者想尝试找寻原因，但很多一点一滴的小事，细小到连自己也忘记了，但在渺小的东西也会积沙成塔，症结形成了，发现再也解不开。“父母所谓以前𠮶啲指腹为婚𠮶啲咁，都可以相处一路白头到老，但依家你见好多，哗，好激情，非你唔嫁，一定要成世同你喺埋一齐，讲呀嘛，但唔使两年，已经又分开，好多呀，依家年代唔同，所以依家婚姻系好，我觉得同个社会都系挂钩嘅，个社会就系进步，任何嘢都快。”又或者，罗乐林所讲的现今爱情，也是每个人所面对的东西。
与老婆相处四十多年，罗乐林坦然分开后也没有再想复合之类的事，只要大家相处和谐，大家依然会像家人般相处，他说：“我系煮埋俾佢食，屋企全部都系，你哋要食咩，咁我煮啰，我都系照煮。冇谂（复合），咁几廿岁人都冇话谂点样再分开，再复合𠮶啲，冇啦，呢啲太复杂，做好自己本份，同埋做好依家自己工作，第一，最紧要。第二，身边我自己几个囡开心，佢哋每日有咩都同个老窦联络。”讲起自己三个囡囡，罗乐林笑逐颜开，他说囡囡们会找他去兰桂坊饮酒；囡囡们会买口罩、消毒液给他；囡囡们又会帮他买一部新电话。最重要的是，三位女儿都相当懂事，“佢哋全部佢有佢哋嘅，好叻，三个对住佢（陈宝仪），喺同佢哋嘅世界又可以共存，一嚟到我呢度，知道我唔钟意乜嘢钟意乜嘢，，所以我话佢哋几个好。好开心，佢哋令到个屋企唔会添麻烦，好识谂，三个都唔同妈妈，佢哋都可以，我大囡同第二系之前𠮶个（太太），三个相处得好好。”
有女万事足，放在罗乐林身上是最好不过的形容。今年71岁的他，九年前与老婆分开，或者有很多人认为，去到这个年纪何必再要搞那么多动作，反正都过了那么多年，好丑好坏忍到最后就算了吧。但他就是不走世人的路，分开后也没有新的一半，纯粹忠于自己的想法。每对恋人的相处方式也不同，换个方式去爱你，或者这就是罗乐林的爱情之道。
点击睇罗乐林经典作品