钱嘉乐坚持真实动作拍摄　连张家辉古天乐都好难接受

回顾香港70至90初期，港产动作电影大行其道，出产过无数功夫英雄及警匪枪战电影，电影产业成绩辉煌，可以话正值黄金年代。不过随著科技发展及社会不断进步，大部份爆破飞车特技场面，后期都由电脑CG特效制作，所以大多演员对旧式拍摄手法拳拳到肉打斗场面有微言，钱嘉乐慨叹：“用后期制作出嚟嘅效果，咁呢啲只系一个演员，实实在在做出嚟嘅，先系武打巨星。”

演员质疑实拍特技动作场面双方差点反目

纵横影艺圈超过三十年，现任《香港动作特技演员公会》会长兼武术指导的钱嘉乐，初入行时为港产片龙虎舞狮（洪家班），对于港产动作电影如今非昔比，嘉乐仔有一番感受：“其实大家如果有留意到我拍嘅电影，我都要求实拍嘅，好多演员就因为咁差啲同我反面，佢哋会质疑我宜家仲要咁拍，我就会解释畀佢哋听，点解我哋会出咗个国际巨星李小龙同成龙，正因为佢两个都系真真实实咁做出嚟，先成为巨星。如果系画出嚟又或者用后期制作嘅话，咁呢啲系一个演员，呢啲人大有人在，而我哋正正做紧呢样嘢。”

曾与两大影帝张家辉古天乐合作有争拗

嘉乐提到当年为电影《使徒行者》担任动作导演时，曾与两位影帝级人马张家辉和古天乐因拍摄动作特技时有拗撬，有感而发话：“我最贴身嘅感受就系，当你要说服一个演员，再去同你用返80年代嘅方式去拍，佢哋好难接受，以前我就真系拍唔少喇，试过喺8楼咁高跳落去，被几个汽油弹炸过都试过，以前系实实在在做出嚟，所以香港特技人连荷里活𠮶边都会觉得惊，心谂呢班人傻㗎，所以当时我哋系闯出名堂，咁所以我好想保留呢啲嘢，但我又唔可以不择手段去迫佢哋去做，但我有同佢哋两个解释拍出嚟效果好𠮶个唔系我，系你哋两个。”

打得出色观众加分  慨叹演员不领情 

嘉乐续说：“好似电影《东方不败》林青霞和《皇家师姐》杨紫琼，好记得当年睇完《皇家师姐》午夜场出到嚟啲观众就话条女真系几好揪㖞，但《东方不败》林青霞更好揪就系，手指一弹熄支蜡烛，几十人就死系面前，但人哋唔会话林青霞好揪，只系话程小东拍得劲，我话你想我攞呢个分？定系想呢啲画面出到嚟之后，你哋啲演员攞分？点解我咁辛苦咁拍，要你哋自己嚟一个，系因为最后个画面系你自己嘅角色张家辉演员攞分。”

盼港府缩申请场地时间表  配港影业发展

要促成港产动作特技电影重生，除要靠一众演员之外，还要香港特区政府配合批出场地供拍摄，但嘉乐直指现有政策下批出场地需时过长，令很多电影投资方却步，形成一个重大障碍：“其实自从我做咗会长之后，都有同政府相关部门开会倾过呢个问题，初头我唔了解外国制片嚟到香港拍嘢可以咁样封路，而我哋就唔得，咁原来外国片佢哋差不多九个月至一年之前经已申请，咁我哋就反映番香港制作唔可能一年前已经养呢班人，系冇可能埋到班𠮶啲制作费，希望佢哋可以缩短审批时间至三个月，配合番我哋香港电影公司会做嘅嘢，咁所以佢哋明白宜家慢慢微调去迁就。”