传张致恒双喜临门后陷经济危机　去酒店炒散做厨脚踏实地

最近张致恒（Steven）双喜临门，先做人父，又再与雯雯结婚升呢做埋人夫！不过亦都系因为呢个“双喜临门”，Steven搞到形象插水，先嚟一波Unfriend／Unfollow潮，再嚟就系幕前工作进入冰河时期，有传冇人揾佢开工！不过，“人总需要勇敢生存”，近日就有报道指Steven为养妻活儿，去酒店炒散做厨师帮补家计！

做个负责任嘅男人

有报道指，Steven最近经朋友介绍去咗一间位置港岛区嘅酒店做兼职厨师，专责负责自助餐，该报拍摄到Steven着晒厨师制服而且身兼多职，切牛肉、切鱼生、斩烧味、渌面样样皆精非常专业！不过佢就带住口罩，同眼镜，冇食客发现。到收工返屋企，Steven排队等巴士，用八达通畀钱仲识睇埋余额，行为相当贴地呀！其实Steven结婚冇耐，阿仔又得半岁人仔，太太雯雯又要专心凑B，幕前冇工开冇收入，要转行都可能系逼不得已，加上做酒店炒散人工不俗，据知每小时可赚接近$100。雯雯亦曾喺Instagram度分享心情：“生活中，你无需要告诉别人，你有多苦，有多难，有多累。做该做的事，走该走的路，不抱怨，不退缩，不动摇。请相信自己，无论多难，也要告诉自己坚持下去：哪怕每天只能进步一点点，也比原地踏步好。永远相信‘路是人行出来的’！”