【金宵大厦】TVB欠李施嬅视后？　拍摄时已决意离巢：所以好珍惜

无线新剧《金宵大厦》讲述饰演看更阿萧嘅陈山聪，同饰演空姐Alex嘅李施嬅一段宿世情缘。虽然暂时只系播出三集，但网上评价一致向好，尤其对已离巢嘅李施嬅，由第一集拗腰扮风情、姣女人到之后发现自己唔小心做咗小三时委屈爆喊，演技相当到位。

李施嬅加入无线16年，于多部电视剧中担任配角，凭《紫禁惊雷》的卓紫凝、《寒山潜龙》的殷媚娘／桃花大获好评，虽好几次获提名“飞跃进步女艺员”，奈何永远都只有替别人高兴，最后连佢都开始怀疑自己嘅实力，曾在《胡说八道真情假期》哭成泪人表示“自己唔够好？唔系好演员？”，加上今次《金宵大厦》的演出，令唔少网民都为佢不值，认为无线欠了李施嬅一个视后的加许。

李施嬅接受《香港01》访问时表示，对于新剧反应不俗，既感动又感恩。“感激大家为我感到不值，但我从来都唔觉得TVB欠我任何嘢，因为我有嘅嘢都系TVB畀。其实之前喺《荷里活有个大老千》反应都唔错，尤其系教点样勾引男人𠮶part，好多观众话好好笑，但唔及今次系整体被赞赏，好多朋友msg我同tag我，已经比得到任何奖座更开心，亦都可以为自己留下一个好好嘅回忆。”李施嬅透露在拍摄《金》时，已有离巢的打算，所以每日开工都会特别珍惜。“因为唔知下一套剧系几时，所以每一刻都好珍惜，虽然今次好多通宵戏份，但辛苦得嚟都好enjoy。”李施嬅认为《金》并非大堆头制作，宣传又不算强势，但却意外地获观众留意兼赞赏，对于她与陈山聪来说可谓鼓舞。