阿仔英国会考11科夺A* 老窦森美不敢邀功：系靠佢自己努力！
森美与拍档阮小仪昨晚齐齐出席商台60周年晚宴，两人合作至今已经超过20年，森美接受访问时多谢公司表示：“多谢电台喺过去咁多年畀咗个好拍档我，又畀咗个太太同家庭我，太太都系当年一齐考DJ时认识嘅。”森美又同大家分享了他仔仔的威水事，他说：“我个仔啱啱喺英国会考完派咗成绩，11科拎晒A*，所以做老窦就好开心啦，我仲同佢讲话‘I'm proud of you’。佢喺香港读书成绩麻麻哋，但喺英国有好好成绩。”
被问到可会想仔仔返香港升学，森美坦言：“我做父母呢就想佢返香港，咁我可以见得佢多啲，就算香港有几难挨都好，将来经济好唔好又好，政局好唔好都好，最紧要一家人喺埋一齐呢，咁就咩都唔使惊喇。我好希望佢可以返嚟啰，但系如果佢话‘唔系㖞，我想喺英国读书做嘢㖞’，咁都无所谓嘅，都会支持佢。”他又笑言：“以前都惊个仔唔系自己嘅，咁叻就知系自己㗎喇。”森美当年在香港的会考成绩是1A5B（25分），相当优秀，而现在已经被他的仔仔追过了。
《香港01》电话访问了森美，问他可有督促仔仔读书，他说：“主要系靠佢自己努力，咁佢临考试前，我太太都会飞过去陪佢，畀精神上嘅支持佢。考到呢个成绩我哋都好意外，佢自己都唔相信，仲问老师科Eng. Lit. （英国文学）系咪真系拎到呢个grade。今次可以畀啲自信佢，等佢相信自己系可以做得到嘅，有信心同勇气去读自己想读嘅科目。仔仔喺香港读书好吃力，英国制度无咁吃力同无咁大压力，佢读得轻松啲。”
自认是典型香港老窦 渴望儿子成才
至于可会要求仔仔将来在大学选修医生律师等专业人士学科，森美表示：“我系一个典型嘅香港老窦，咁都会想佢读啲专业学科，但系佢次次返嚟同我讲佢想读嘅科都吓亲我，例如想读History、Philosophy、 Economics、Politics等等，有次仲话要读咩PPE（Philosophy, Politics and Economics） ，我听到惊，我太太话呢科系神科嚟，因为得剑桥有得读，咁我就觉得OK啦。其实最紧要系自己小朋友喜欢，佢想读咩我都唔会阻止佢。（会唔会望子成龙？)）如果系就最好啦，不过我喺我嘅人生当中觉得最重要都系快乐，所以我觉得佢能够得到快乐就已经足够喇。”
森美表示很少在学业方面给予仔仔压力，反而是在做人处世方面会对仔仔有要求。他说：“一个人唔系净系读书嘅，我细个时都唔系将所有时间放晒喺读书上，例如社会服务、运动、社交、家庭生活、信仰等等好多方面都要做好，我对佢系有呢个要求嘅。希望佢喺做人处世方面畀自己有高啲嘅标准啦，对自己有多啲嘅要求，佢性格比较Carefree啲，所以我会喺呢方面会畀多啲压力佢。我睇性格嘅，我囡囡对自己要求比较高，我反而会叫佢放松啲。”
自爆儿子才是“怪兽小朋友”：派完成绩表仲去补习！
至于森美是否一个怪兽家长，他表示：“我系有某啲怪兽家长嘅元素，例如会有好嘅Planning，我觉得好嘅Planning系重要嘅，但系仔女系咪根据自己嘅plan呢？咁就交畀佢哋喇，我谂小朋友应该有自己嘅选择，咁可以畀好多嘅choices佢，究竟佢拣边一个呢？就交由佢哋自己喇。我仔都好有佢自己嘅谂法。”他又大爆仔仔是个“怪兽小朋友”说：“都派完成绩表佢仲要走去补习，补咗3日，星期日都话要去补，我话唔得呀，要陪我家庭乐。我怀疑佢一定系识咗个女仔，但系问佢佢就话唔系，咁样我仲惊。”
点击下图逐格睇森美嘅靓相：