森美自细迷上金庸小说爱不释手　在武侠世界悟出人生大道理

著名武侠小说作家金庸昨日 (10月30日) 与世长辞，享年94岁，他笔下的小说作品无一不是华人经典，深受大家的喜爱，不少人家中都会有至少一套金庸的著作，甚至全部系列的珍藏。森美呢日就于他的IG上载了一张相，相中是他家中的金庸著作收藏，更是旧版来的，证明森美很早就已经迷上了金庸的小说。

森美留言表示：“在你家中这套书伴你多少年？无边际的幻想中，我们竟共享同一个江湖！”从相中见到他的收藏入面包括《天龙八部》、《神雕侠侣》、《鹿鼎记》、《碧血剑》、《飞狐外传》以及《侠客行》等。而其中有一本打开了的小说更是已经发黄了，见证住历史留下的痕迹。网民亦纷纷留言同森美分享他们的珍藏。

森美咁迷金庸的小说，他是甚么时候开始看的呢？他接受《香港01》电话访问就话：“我系读中五、中六嘅时候开始睇嘅，啱啱考完会考就成日睇，系睇到停唔到嘅，好有追看性。呢个都影响到我长大后喺创作上，写故事时知道要留个尾巴延续个追看性，要点样营造出嚟呢，令我学到嘢。以前写广播剧一日一集，就会谂点样可以做到令人想追睇呢？”

他透露自己第一本睇的金庸小说是《射雕英雄传》，是当时的女朋友介绍他睇的：“金庸嘅小说唔系净系啱男仔睇嘅，好多女仔都钟意，我屋企套书系我老婆嘅。”他亦有介绍给自己的小朋友睇。

森美更从金庸的小说中悟出了不少人生大道理：“细个睇《鹿鼎记》会觉得好似韦小宝咁就好喇，有咁多个老婆，但系同时间又会觉得到做韦小宝其实都唔容易㖞，佢好似横冲直撞攞到世界上最好嘅嘢，但偏偏喺最好当中都有好多付出同麻烦嘅，令我终于明白到就算得到最好嘅嘢其实都要有好多付出。”

“仲有《笑傲江湖》入面嘅令狐冲，佢练吸星大法要清晒自己嘅内功先练得到，又误打误撞先练成最难𠮶部分，咁我就会觉得呢个世界就系咁，冥冥中有主宰，佢最想得到嘅吸星大法，如果无受到苦痛系唔会得到嘅，人生都系咁样，唔好因为你嘅失而太过伤心，就系你嘅失而造就咗你将来嘅得。”

而森美最钟意的金庸小说改编电视剧就是梁潮伟所主演的《鹿鼎记》，他最喜欢的角色就是韦小宝和令狐冲：“如果可以畀我演到佢哋是旦一个都好，不过依家我都无机会做到金庸笔下嘅男主角㗎喇，如果畀我做到周伯通会觉得真系无憾喇。”