【十二传说】刘佩玥曾与鼻鼾鬼同眠：我𠮶晚都瞓得好好

刘佩玥 (Moon) 出席有份主演的剧集《十二传说》宣传活动时，分享了她亲身遇过的灵异经历。她说：“𠮶时我做紧空姐飞咗去上海，入到间酒店房我闻到好大阵烟味，咁我就同酒店职员讲话想转房，佢哋话啲booking好爆，只能够转间尾房畀我，我本身唔惊住尾房嘅，就入咗去住啦。到我瞓觉𠮶时，我听到耳边有男人扯鼻鼾嘅声，当时我好嬲，因为我好攰好想瞓，于是好大声话唔好嘈！之后就无晒声，我𠮶晚都瞓得好好。”

原来Moon属大胆之人，身为基督徒的她唔怕黑、唔怕鬼亦唔怕昆虫。她说：“我觉得鬼怪呢啲嘢宁可信其有，不可信其无，但系只要做人光明正大，光明磊落，就唔使惊。万一唔好彩遇到，如果佢搞你嘅话，要畀佢知道你系强势过佢就得，当然你又唔好走去搞佢啦。”而她做空姐时亦听过不少同事的撞鬼经历：“有同事试过见到有嘢喺泰国跟住佢，跟到佢上机返埋香港，佢唔返得屋企，要即刻去揾师傅帮手处理。”她笑言自己唯一惊的就是她妈妈。