【婚内情】与关淑怡相隔24年合唱主题曲　黄耀明：你哋有眼光！

ViuTV新剧《婚内情》揾嚟邓萃雯、陈锦鸿及廖碧儿等主演，选角及剧情都令观众相当期待。呢日仲上载短片公布剧集主题曲，揾嚟廿多年无合作嘅黄耀明关淑怡，合唱暗黑氛围嘅非典型电视剧主题曲《快乐到死》，令网友非常惊喜！明哥接受访问时都话：“你哋有眼光啦，电视剧主题曲应该要有一个新嘅方向！”

明哥接受访问时表示，呢次接到ViuTV邀请令佢颇意外：“我谂对上一次唱电视剧主题曲，好似已经超过四分一世纪前啦，最重要系同我合唱嘅系关淑怡。我哋上一次合作应该系24年前嘅《万福玛利亚》，真系好耐好耐之前啦！都几意外㗎因为呢首《快乐到死》唔系好典型嘅电视剧主题曲，系电子音乐，流行音乐里面有一种叫歌德式风格影响，往往令人有一种好暗黑嘅氛围。大家一齐去做啲唔同嘅嘢啦，你哋有眼光啦，电视剧主题曲应该要有一个新嘅方向。”

歌曲MV会喺4月29日首播，呢日公开嘅制作片段见到部分《婚内情》片段，关淑怡都表示呢首歌好能够描述到角色心理状态：“《快乐到死》呢个歌名我觉得几黑暗嘅。‘后悔吻了吻到四季之外’你后悔去吻一个人，我谂唔使讲大家经已可以想像到，好似好快乐好似好美丽，但系大家都好清楚呢套剧叫《婚内情》，𠮶种快乐𠮶种美丽，系咪真系快乐呢？”