黄心颖传已离港避开是非　暗交许志安半年经常一齐健身撑台脚　

喺黄心颖嘅IG集邮簿当中，除有唔少同马国明合照之外，许志安喺呢两年间亦频频出现，到底年龄差距逾廿载嘅“安心”系由几时开始，相信只有当事人最清楚。再睇睇许志安同朋友、同事嘅合照，或者系因为黄心颖老是常出现嘅缘故，所以有消息指“安心”其实已暗交半年多，之不过，由于男嘅有家室，而女嘅又有公开男友，加上二人在工作上大缆都拉唔埋，所以才未有引起怀疑。

之不过，凡走过必留下痕迹，有网民发现安心上月初曾经齐齐去到九龙城撑台脚，虽然未有同框画面，但二人就分别与职员合照，而餐厅事后将合照上载到FB并发文：“嚟XX食饭，顺便撞星星#许志安#心颖BB。”尽管安心喺工作上大揽都拉唔埋，但二人均使用同一健身室，故私下见面嘅机率可谓十分高。

自从偷食事件后，黄心颖一直未有现身，就连道歉都系透过无线高层乐易玲向传媒交代后，自己才在IG发文。有报道指，黄心颖于上星期已知悉偷食片段将会曝光，而当时她正身在大马与黎诺懿拍摄《懿想得到》，被吓至失魂落魄兼严重影响拍摄进度，导演见势色唔对，随即与乐易玲报告，随后黄心颖才和盘托出。报道又指，乐易玲对于黄心颖偷食一事感到十分愤怒，除勒令她不用拍摄《懿想得到》之外，并著她立即离开，飞返温哥华避风头。

否认黄心颖离港传闻　乐易玲：佢喺香港！

不过，乐易玲今晚（19/4）却否认黄心颖离港消息，她接受传媒访问时说：“佢喺香港！”提到黄心颖主演的剧集被抽起，她便指未知最后播出的时间，只希望事件可以尽快过去。至于会否与黄心颖解约？她答谓：“暂时未谂呢个问题，佢仲有好长嘅约，暂时停工系佢自己嘅意愿，始终需要时间。（佢会亲身交代事件？）等佢Ready先，暂时都未得，我哋都好担心佢，而家净系播首歌都反应咁大，迟啲先。”

【力撑黄心颖】落选港男梁裕恒大起底 曾扬言：我想要知名度！