【早霸王】男听众又要追又要缩　森美：成件事最随便𠮶个系你

香港有唔少Call车App，相信大家都一定有用过。今集《早霸王》“你知道唔知道有人挂住你”男听众阿洋，本身系一名客货车司机，而佢致电原因系想同老婆表白，虽然唔符合节目“暗恋”嘅条件，但当森美听完阿洋点将呢位老婆追到手时，都不禁要赞好，并且叫各位男士好好学习。

阿洋透露“老婆”当初call佢车返学时，落车时发现身上只得一千蚊，加上又赶住去考试，所以阿洋就提议“老婆”考完试再过数，并互相交换电话号码。而其实当日“老婆”考完试之后，系要即刻赶去机场，完全做到香港人work hard play hard嘅精神。“见佢上车时系T-Shirt热裤，但佢要去日本，我check过当地仲系冻冻哋，所以即时whatsapp提佢要换返条长裤。”由于有电话号码，所以阿洋好快就揾出“老婆”嘅fb并发现佢似乎系刚刚失恋。“我都有问佢系未同男朋友一齐去旅行，佢话同两个朋友去。”喺过往嘅“你知道唔知道有人挂住你”环节中，森美不时提醒大家要“试探”，而阿洋今次就真系做到足。

试探成功后，阿洋即时乘胜追击，同“老婆”日日WhatsApp，而对方亦有分享喺日本旅游时嘅照片。“佢话出街落雨都挂住同我WhatsApp，结果趺咗落水氹。之后有提议返香港约我食饭，但我唔知呢个女仔系认真定玩玩下，所以请咗佢食柠檬。”明明系阿洋想追人，但又要缩沙，呢个“以退为进”嘅玩法，连森美都忍唔住大叫“痴筋”，并笑言成件事最随便𠮶个系阿洋，不过原来好戏在后头。“佢日本返香港时，以为我会接佢，但我话好眼瞓，所以帮佢call的士。”接连请对方食柠檬，连森美都觉得呢段感情“无可能”，到底阿洋又系如何夺取欢心呢？

“有日佢食早餐，我突然出现喺餐厅，之后第二日又系咁出现，然后就开始约出街，带佢睇日落时锡咗佢一啖，佢后来有同我讲返‘如果你𠮶日唔系带我去睇日落而系睇戏，一定唔会比你追到’”阿洋表示拍拖无耐已经认定对方，最后仲拉埋天窗，虽然森美坚持“因为唔系暗恋故事，所以唔会打电话”原则，但佢就大赞阿洋“有心追求”对方之余，亦会了解对方嘅感情状态，并指有好多人“唔理对方有无另一半系好傻”，同时提醒大家唔好成日都“以为”。另外，森美又指追女仔时，心意非常重要，就好似阿洋会安排睇日落，如果对方肯应承，而过程中又未有话“快啲走”或者“黑面”，咁其实已经好大机会，而最最最重要一点，森美就话“唔可以太chok，全程搞笑，一下浪漫咁就够”。单身嘅男士们，学嘢啦。

即刻投票，拣选你心水男、女主角，仲有你最撑嘅香港电影，即有机会获得戏飞。《香港电影我撑场．民选大奖2019》投票专页：https://voteforhkmovies.hk01.com/