【你咪理，我爱你】王祖蓝恶搞经典海报　《尸杀落车》系咩玩法？

王祖蓝处男执导嘅《你咪理，我爱你！》碌咗人情咭请嚟“星闪闪阵容”，大家睇星睇戏之余，又有无发现戏中有位人兄老是常出现，呢个彩蛋其实都几有心思。

恶搞电影海报

方力申同王菀睇戏一幕，大家有无发现戏院外嘅海报有少少怪？系呀，因为每一张海报主角都系王祖蓝！！！疯狂恶搞经典电影《叶问》、《尸杀列车》、《八仙饭店》、《闪灵》、《沉默的羔羊》同《驱魔人》等，除咗恶搞出嚟啲戏名够晒爆笑之外，对制作要求认真嘅祖蓝，仲每张相都跟足原著，无论造型、神绪、动作、色tone都系一丝不苟，出嚟效果相档爆笑。而佢一手捧红嘅临时演员阿梦，亦有助阵拍摄恶搞海报。

点解要咁做呢？祖蓝接受访问时表示：“因为我哋一直都为咗电影海报嘅版权而烦恼，冇理由一间电影院度系完全唔见海报架嘛，但如果用正版海报，又有版权问题。然后我哋绞尽脑汁之际，有同事话不如玩恶搞啦，我哋觉得呢个提议好好，咪恶搞咯。你哋咪以为我哋hea住恶搞，每张海报，就算好细嘅字都系用心度，有啲同事睇完都笑到肚痛。为咗呢批海报，我同梦足足用咗大半日时间去拍，所以到拍完，我哋都珍藏喺公司唔舍得唔要。”

臭都无所谓

《单身监狱》𠮶场嘅主角虽然系梁嘉琪、阮兆祥、罗兰、苟芸慧同汤骏业，但全场最抢嘅竟然系王祖蓝。佢虽然喺呢个场口系“快闪党”，但因为佢个造型相当颓，一头乱发之余，仲要加埋趣致嘅表情同埋“造手”，真系见一次笑一次。不过原来呢场戏系无心插柳柳成荫，事缘“祖蓝”原本冇安排自己现身，但因为拍摄时出现阻滞，令到相关场口delay咗足足大半日才能正式埋位开工，而准时到场准备饰演“精神病患者”嘅临演亦因为“够钟收工”而未能如期演出。结果在冇得拣嘅情况下，祖蓝决定亲身上阵，岂料出来效果相当爆笑，获剪接师加重戏份。据知，原本有另一名工作人员跟祖蓝并肩上阵，但因为该件戏服经过一日汗水洗礼后传出异味，同事最后拒做“臭的替身”，令祖蓝最后孤身上阵。为咗场戏，连臭味都顶得住，祖蓝真系犀利。

倒后镜里的男人

好喇，考眼力指数愈嚟愈犀利喇，呢个场口嘅祖蓝已经相当难发现喇。佢到底喺边度出现呢？就系架车嘅倒后镜入面喇，系咪估你唔到呢？点解会咁呢？事缘有同事觉得架车嘅倒后镜冇人好似相当古怪咁，跟住导演就自告奋勇，一支箭标上红馆度扮讲电话；据知为咗令个倒影可以好准确咁投射喺倒后镜度，祖蓝净系同工作人员对位都搞咗好耐，无聊得嚟够晒心思。

后尾枕都唔放过

最考眼力嘅时刻来临了，到底呢一格个王祖蓝喺边度？竟然系喺后面健紧身，你认唔到佢件“招牌白底衫”，都认到佢个头箍look喇嘛。咁样都要“抢镜”，呢位导演真系好鬼naughty。

打杂都捞埋

去到最后，就算你几好眼力，都唔会知道王祖蓝喺边度出现，唔系睇小你哋，系因为呢part嘅祖蓝系喺镜头后出现，应该要有天眼通嘅朋友先可以见到佢。话说呢场“掟食物”戏需要工作人员掟嘢，但因为各人都有自己嘅嘢忙，所以导演决定捞埋打杂，喺镜头后面出力系咁掟阿凌文龙同汤怡，真系笑死人。唔知啲演员，见到导演喺度猛咁掟包时，佢哋心入面又谂紧啲乜嘅呢？

【周五心意运动】您捐一封$50利是，已可为基层送上温饱，01心意呼吁您支持【食德好】，每$50可为12个家庭提供一餐回收蔬果及食物：https://heart.hk01.com/zh/project/10003