【张学友演唱会】歌神自认取消场次最多歌手：我明白华仔心情！

张学友《A CLASSIC TOUR学友．经典》世界巡回演唱会开完200多场后终于重返香港，在今晚（11日）举行的首场里面，学友便为观众带来多支首本名曲，既有劲歌，又有热舞，令歌迷完全唔舍得走。虽然看似势轻就熟，但学友骚后接受传媒访问时却直言好紧张：“压力大，免疫系统就差啲，上次喺高雄站已经有少少唔舒服，所以今次上台都系带住少少唔舒服，又扭到条腰，大家都应该睇到我冇咗惯常超过90度嘅鞠躬，仲有14场，尽量小心啲。”

记者问腰伤情况如何，学友反问：“你哋觉唔觉？（唔觉。）所以情况OK，跳舞都OK，唔系好大问题。”他又笑言不用医生随队，情况不严重：“其实医生都有畀定药，预防流感，食完就晕晕哋，但系冇咩影响。”他更谓因为场数多，好多情况都发生过，所以有晒应变方法。

提到同样是“四大天王”之一的刘德华因病取消多场演唱会演出，学友坦言：“我听到呢个消息仲惊，有心理压力，都希望佢快啲好返！我自己就应该系取消最多嘅歌手，所以都教唔到佢咩嘢，不过就好明白取消嘅心情系点，我哋上得台梗系想好，做唔到最好已经唔好开心，做唔到件事就更加系好辛苦嘅事。”

讲到大女儿张瑶华亦是座上客，而且睇得投入又跟住唱，学友即笑说：“佢都系我歌迷之一，经过今次演唱会之后！（佢系你强心针？）佢都睇咗好多场。（拉埋佢上台表演？）唔会。”他坦言女儿都担心他健康情况，但自己都会尽力做好、做完这个演唱会：“其实都唔系太辛苦！”

传闻学友巡唱后会“封咪”，他再一次辟谣：“绝对冇啲咁嘅事，其实我喺台都成日讲，‘睇得一场得一场，睇完就冇’，我都唔知个风系唔系主办放出嚟！虽然冇人知听日会点，但系我自己就钟意做，真系钟意喺台上表演，同埋我唔系几钟意退休呢件事，我希望自己可以喺唔同时间，发挥、试下唔同嘢，因为唔试就唔知，我之前都唔知自己仲跳得。”他又承认前段有少少声沙，一来未完全开声，二来音响未较得准：“不过后面都冇乜嘢。”