张学友开骚唔只做善事　永久预留指定位置背后有洋葱

歌神张学友为期两年嘅世界巡回演唱会“A CLASSIC TOUR学友．经典”，下个月将在香港画上完美句号。虽然一票难求，但有指学友每场都会预留“第8行26号”呢个位置，原因系有位患癌症嘅歌迷，最大心愿就系去睇学友演唱会。

虽然佢几经辛苦先买到“第8行26号”呢个位，但开骚前不幸过世，有指学友知悉后十分难过，于是决定将每场演唱会嘅第8行26号永久保留，借以纪念呢位忠实歌迷，感谢佢同病魔对抗时，仍不忘对自己嘅喜爱，用生命去支持自己，到底呢个传闻系真系假呢？学友虽然冇回应过，但其所属唱片公司环球就话：“无此安排，唔清楚系咪歌迷自发行为。”

有网友指出，会每场演唱会预留特定位置嘅其实系内地歌手周笔畅，事缘唱片公司早年为周笔畅举行首埸个人演唱会前夕，其好友因交通意外去世，周笔畅为纪念好友，而将与自己生日7月26日同号嘅“第7行26号”坐位永久不卖，并会在该位置放上鲜花。

学友虽然无预留位置，但佢每次开骚，都会叫朋友以米代替花篮、又或者叫朋友将心意转化做善款，帮助一班有需要嘅贫困老弱长者，等佢哋可以得到免费中医诊疗服务。下月嘅香港站，学友都鼓励大家将心意转化做善款，因为每100元就可以帮助一位病人获得一次免费嘅中医诊疗及3日内服药。