【是咁的，法官阁下．专访】编审李茜坚持感情戏：冇会角色空洞！

《是咁的，法官阁下》今晚（1/12）迎来了大结局，虽然剧集的主轴是一班年轻大律师奋斗故事，但仍然有不少“旁枝末节”──感情线，而编审李茜却直言，一套剧有爱情线是相当正常，而且有不少演员第一件事就问她剧中有没有感情线。原来一直以来，有观众不停说TVB过多多余感情戏，但在演员和制作人员的眼中，却是相当重要。
摄：叶志明

李茜是一名资深编剧，1979年便加入TVB，之前做过3年记者，主要采访法庭新闻，第一部有份编剧的剧集叫《抉择》，之后《轮流传》、《播音人》、《老友鬼鬼》等80年代的剧集也有份参与。到过浸大电影学院教书的她，于2015年的时候重返TVB帮《四个女仔三个BAR》担任编剧，之后就到《是咁的，法官阁下》。“做过法庭记者，对于点样去审案有个基本嘅概念同认识，写（剧本）嘅时候会顺手啲。剧中所有嘅案都有参考案例，法庭有发生过嘅嘢，有参考但唔会完全搬字过纸，始终每件案我都有啲地方唔知，如果照写落去，会对牵涉案中嘅人唔系好公平。”李茜说。

做过法庭记者，绝对有助她处理法庭戏事得心应手，她说：“要睇返边个角色处理𠮶单案。如果系师傅级嘅律师或大状。咁啲案一定会大单啲、严重啲或复杂啲，但如果好似戏中嘅新仔，头一两年唔会打官司，通常系类似过堂、求情之类，个背景可能只会去到裁判处等地方。如果要去区域法院或高等法院，就可能要去到大师傅格离𠮶个Junior，所以写法庭剧本要考虑到系乜嘢人嘅戏，再安排啲乜嘢案俾佢。”

经历多年的法庭听审，对于李茜来说，比起观众只能靠电影或电视剧接触法庭，知道的事一定更多。“例如打打下突然换律师，咦！原来系可以嘅，又或者打打下证人有啲问题，或者突然改口供，咁要点处理呢？又可能打打下场官司，个官觉得律师准备得唔充足，原来会闹！喺《是咁的》每个案件里面，我都想有啲新啲嘅嘢去带出嚟，剧中每个个案都有呢啲元素，想观众睇法庭戏时增加多少少法庭嘅常识。”将睇剧变成学习知识的一种方法，绝对是一件不容易但伟大的事。“当然啦，法庭基本上系每个公众人士都可以入去听，但要花好多时间，一个剧如果可以除咗有一啲娱乐性畀观众之外，仲可以带一啲知识带到畀佢哋，咁其实几好，增加佢收看嘅趣味性。”

在剧集的开始部分，有一个故事是用卢宠茂“倒地”事件作借镜，又有学生集会等例子，被人觉得是政治抽水，不过李茜就有另一套看法：“抽水就一定唔会喇，我点样去拣个案，一定有参考实质上有发生嘅个案，你公平啲去睇个事件，系一件校园事件，一个老师被辞退，或者叫不被续约，背后原因原来系佢唔肯再做‘枪手’，学生觉得佢系一个好老师，呢啲个案其实喺唔同嘅大学系有发生过。我觉得如果我要写一啲校园事件，我必然要参考一啲校园有发生嘅嘢，我完全唔觉得系敏感，呢啲嘢我觉得系可以讲，点解唔可以讲呢？学生喺校园有不满示威，亦唔系今时今日先发生嘅事。”

正如李茜所说，如果有观众看完此剧，觉得剧集是抽水，她不会阻止这种个别想法，“但我作为编剧，我面对返整个个案，系有好仔细嘅布局，唔系只系普通一个（剧里面嘅）突发或冲击，唔系就咁就算数。所以网民如果觉得系抽水，唔紧要，呢个系佢哋嘅睇法。”

重点来了，近来不少观众说TVB太多感情线拖戏，讲法庭又有感情戏，讲医护人员又要感情戏，而且又是三角恋，太过老土。对于这个，李茜有独特的看法，她说：“其实有两种观众，有啲就会话冇爱情，佢想睇爱情；有啲又会话搞专业嘢搞咁多做乜，无啦啦又整个三角恋。我先讲观众𠮶度啦，通常我唔系好理，我觉得有就有，好似《是咁的》就唔多。但好似《四个女仔三个BAR》系后生仔女戏就会有，今次唔多唔系因为网民。另外，你讲嘅系一个25个钟头嘅故仔，我觉得有爱情好正常啫，人系有感情嘅动物，你唔结婚有唔结婚嘅感情，结婚有结婚嘅感情，同居有同居嘅感情，我觉得如果整个戏冇感情线，呢样系唔正常。”

不只观众，其实演员对感情线都有看法，不过却是要求有感情线，“我同演员倾偈讲个角色，佢第一样就问你，我个角色有冇感情线。我先发觉原来对于演员嚟讲好重要，真系十个有十一个系咁，因为感觉来自情呢样嘢，所以对佢哋嚟讲，你冇嘅话个角色系空洞。观众一定要明白，我从来唔觉得三角恋有问题，今次都有少少三角关系，其实仲有咩可以变化呢？两个人互相钟意，三个人四个人，系冇新嘢，我唔介意继续写三角恋或者几角恋都唔紧要，分别在于人系有变化，你写得好唔好睇呢，而唔系话又系三角？如果𠮶啲观众觉得又系三角，咁咪唔好睇啰！真系唔好睇，如果真系为咗又系三角，唔好睇，转台啰。”

其实李茜所说不无道理，一部剧，无论讲的范畴有几专业，有人的地方就会有感情，没有感情线很可能会变成失真。