【是咁的，法官阁下．剧透】肢解犯同饶大状有关　大结局仲有人死

《是咁的，法官阁下》今晚将播出最后一集，不过，估唔到都仲有人死，而呢个仲要系杀人及肢解尸体案疑犯之一嘅阿鬼（陈志健饰）！

阿鬼一直做晒大龙凤寻亲，被警察拘捕更认谋杀双亲，冷血得令人发指，之不过，点解阿鬼会走上成魔之路，陈志健接受电话访问时表示：“佢认为无极端的对与错，因为有啲嘢野发生令佢价值观扭曲，而佢角色系会对应返杰哥，因为佢童年同我都发生咗啲事，令大家在精神压力上有偏差，而我嘅爆发点就系老师。佢令我去偏离咗自己想做嘅嘢，觉得所有人都对佢唔好，最后走上一个好极端嘅位置。之不过，佢自杀并唔系想将罪名推比Bell，纯粹系觉得玩够。”陈志健指阿鬼小时候经常被欺负，加上父母对佢莫不关心，直到老师的出现，如同天使一样对他时呵护备至，但老师后来受伤住院，不知情的阿鬼有感被离弃，于是开始成魔。而在陈志健的角度来看，阿鬼是一个很会计算的人，就好似分尸时，都先等Bell落手。“就算真系被捕，佢都可以有借口，而喺后期佢只系想同班差人玩，玩票性质多于其他嘢。”

陈志健当初收到剧本时，监制有告知剧情以真实案例为蓝本，而他亦有上网看过相关新闻报导。“都有谂过参照一啲前辈做聪明犯罪者时，呼吸或者小动作等，但到现场同导演倾完之后，其实都感受到气氛，同埋其实剧本真系写得好，阿鬼有讲过呢个世界其实都系一个监狱，有钱可以住靓监狱，与其都系挨，不如早啲解脱，所以佢杀父母都系想帮佢地早啲解脱，当入咗戏嘅时候，好自然会谂到点去发挥。”虽然肢体父母案呢个单元只得几集，但陈志健并不介意戏份多少，认为无论系监制、导演抑或编审都希望做好呢件事，令佢觉得一定要支持。