【是咁的，法官阁下】细细粒睇《踏血寻梅》学分尸：𠮶阵情绪好怪
《是咁的，法官阁下》话咁快已经去到结局篇，剧中饰演阿Bell嘅细细粒因为被杜大伟饰演嘅Lone虐打而跟佬走，结果变成杀人及肢解尸体案疑犯，由于Bell本身乃低智商人士，面对指控完全无力反驳，只系识得喊同喊，同过往佢多数饰演嘅角色有所不用，佢自己亦喺fb写到为《是咁的》投入了不少心思，希望观众能感受到不一样的她，并指“哭得眼睛也快瞎了，情绪一直进入状态内”，而喺㖊晚(27日)𠮶集，陈志健饰演嘅鬼，于警局内指细细粒将尸体切开一碌碌，而另一边厢，细细粒则好无助咁承认自己有买过牛肉刀同雪柜……
细细粒接受电话访问时透露呢一幕可以话系一个序幕。“我系无杀人，但有处理尸体，之后我基本上都系喊戏，喊到监制都话要cut走啲。”细细粒虽然很想入戏，但现实中完全未经历过杀人、分尸等行为，所以当监制跟佢讲解剧情、要求喊出绝望、惊慌感觉时，都觉得有少少难。“我最后系困咗自己喺监仓入面45分钟，令自己陷入一个情绪当中，再加上拍摄之前睇咗《踏血寻梅》，所以都做到监制想要嘅嘢。”
细细粒嘅戏份虽然唔算多，拍摄时间约为一个月左右，但由于每日都要喊，所以都几有挑战性。“因为要保持住𠮶个情绪，所以当时个人系怪怪哋，每日返屋企只眼都肿晒，阿妈都有问咩事，好在佢都明我做咩紧。”其实细细粒向来都易喊，但喊足一个月都唔系易事，除咗试过喊到唔知做乜，亦试过喊到眼干。“一日至少喊4个钟，最劲好似系8个钟，因为要拍单机同wide shot，有次真系喊唔出，我拎咗爸爸张遗照出嚟睇，即刻崩溃。”问到Bell最后能否脱罪，细细粒就大卖关子，但就暗示因为有角色会死，令佢更难甩身……
剧集播出后，唔少网友都大赞细细粒演技十分出色，又叫佢多啲返大台拍剧，其实细细粒已差不多两年未有拍大台剧，今次以《是咁的》同观众见面，且反应咁好，相信大家好快又会见到佢嘅作品。提到与陈志健处理尸体一幕，细细粒指有部分镜头只需拍出感觉。“其实现场拍唔系好恐怖，监制见到我系咁震以为我惊，其实系因为我跪到好痛，生理比心理痛苦，同埋块面啲血系喷上去，都系咁补。”细细粒表示虽然监制拍摄前有收集相关资料给她参考，但佢就一直都无睇，直到剧集播出后，她才上网查看。“觉得自己真系演绎出低智人士嘅无辜，而陈志健嘅眼神亦好令人心寒。”