【后生仔倾吓偈】冯盈盈用尽男友Quota：怕佢揾其他人做“运动”

最新一集《后生仔倾吓偈》以“热恋期”为主题，众人分别讨论“热恋期有咩特征”、“热恋期系几长”等问题，冯盈盈（FYY）对于以上问题都十分之踊跃，更指“热恋期夜晚好攰”，虽然佢有解释系因为要倾电话，但相信心水清的观众都知道背后原因啦。

大家之后讨论“热恋期已过有咩特征”，FYY毫不犹豫咁写下“夜晚好空闲”，仲话呢个大家应该都好明白：“问题不仅是对手好得闲，或者佢唔系好想做运动，而系自己都冇个心做运动。”FYY回想自己热恋期时，就算系普通运动都会准备好多“健身道具”或者盛装出席，有时甚至有剧情咁去做运动。“之前仲会睇小说参考入面的情节，瑜伽招数都会使出。”瑜伽招数都用埋，唔怪得佢话热恋期夜晚好攰啦。

之不过，到底点解会唔想做运动呢？FYY就话问题出自自己身上，因为当初佢同宝宝热恋时，自己仲系学生，“冇做嘢夜晚就有好多精力去强身健体，逼到佢明明听朝返工都要做运动。”FYY仲话之所以咁Chur其实系担心宝宝会出去揾其他人做运动，所以想用晒对方啲Quota……最好笑系麦明诗听完FYY运动论之后，问佢点解𠵱家又唔担心宝宝会出去揾其他人运动，FYY竟然笑宝宝年纪渐长，同埋见识过佢工作环境之后，完全唔担心，并表示：“总之我对佢有信心。”但麦明诗完全唔收口，更指Call房熄灯之后，做咩都得，激到FYY话录影完之后就即刻返去做运动。

其实喺节目上，FYY仲顺应大家要求，即场以“我今日食药时睇到单新闻，话何文田有块地会拎出黎拍卖，唔知边个发展商…… ”去测试宝宝到底会唔会关心佢点解要食药，结果宝宝一如大家所料，只系回复FYY地皮问题，激到FYY系咁话热恋期已过。