陈展鹏婚后即开工唔赶住造人 单文柔：我系想生但顺其自然！
陈展鹏和单文柔今日（13）正式拉埋天窗，在四季酒店搞婚礼宴请亲朋好友。下午4时许，一对新人接受传媒祝贺及访问：
问：觉得陈生、陈太这个称呼点？
陈展鹏：我OK㗎，唔知佢（老婆）觉得点。
单文柔：我梗系OK啦！
问：昨晚有否瞓唔着？
陈展鹏：都有少少，呢几日都真系好攰，所以安排晒所有嘢之后，好安乐咁，安心咁瞓，因为又要梳头，开头以为男仔唔使梳头，当原来真系要㖞，跟住要摆好晒成个架步，所有嘢呀，方位呀，对住个窗门，贴好晒先瞓得觉，寻晚又帮佢搬啲嘢过嚟（酒店），当然有人帮手，将佢啲婚纱搬过来，跟住先返自己屋企做自己要做嘅嘢，哗，真系学识好多嘢。
问：单文柔你系唔系因为唔够瞓，所以声沙？
单文柔：其实系因为之前已经喉沙了，亦都可能因为想再筹备得好啲，所以我都好紧张，因为之前已经安排咗，但我又心大心细，有Plan B的时候，又想去Replace咗佢，所以就搞到自己冇埋把声喇。
问：今早你哋船上的Party系一早谂好咗，定系一个Surprise畀老婆？
陈展鹏：呢个都谂好咗嘅，因为要安排太多嘢喇，所以冇得Surprise，但系呢一个想法，其实佢开头系O晒嘴。（老婆话）唔系呀嘛，咁如果落雨点算呀？会唔会晕船浪㗎？跟住我就同佢讲，我话你问吓有冇人会晕船浪啰，但系因为我哋真系，头先讲过啦，真系希望有一个比较庄严，比较舒服，比较安静的地方，可以举行我哋自己的婚礼，邀请一啲自己身边的朋友、亲人，所以最后喺好多朋友嘅帮助之下，我哋就拣咗呢一个嘅方法。
问：见到你好有型咁坐住快艇咁样出场，单文柔有冇好冧呢？
单文柔：衬返佢平时嘅造型，应该咁样讲啦，因为其实，在船上搞呢个Ceremony都系展鹏嘅主意，因为佢有好多鬼主意，佢又好想特别啲啦，畀一个难忘啲嘅经历我啦，结果真系令到我好难忘，因为喺船上面，真系会谂好多问题会出现。
问：例如呢？
单文柔：例如，第一，惊晕船浪啦，之后我又担心点样过船啦，时间点样安排啦，即系好多问题都会谂到，咁佢又好有活力，安排得好好。
陈展鹏：但其实因为我已经全部谂晒㗎喇，因为冇一个地方系好过呢一样嘢，例如在香港东北风，边啲海湾会有问题呢？我哋有三四个地点，如果吹北风会点，在甚么位拍航拍又会靓一啲呢？又有果个感觉啦。
问：呢件事，系唔系发现老公真系好可靠？
单文柔：都唔系呢件事嘅，平时都好可靠，佢都系一个计划好周详的人。
问：刚才你说展鹏有很多鬼主意，刚才听结婚宣言的时候，有冇都令到你，我都冇谂过，佢会讲呢啲说话？
单文柔：反而宣言上，佢就比较踏实一点，但我都钟意咁，因为始终都系生活喇，同埋就系佢表达到一个好大的诚意，最紧要就系喺父母面前读呢个宣言，冇得走喇已经。
问：点解有咁大张猫纸？
陈展鹏：系呀，因为真系紧张，真系紧张，同埋今次对我来说系非常之重要，系好重要的事来的，因为结婚除咗我自己嘅大事，对Phoebe，仲有佢父母，同埋佢屋企人都系好重要，所以唔希望有啲咩闪失，尽量去讲到自己想讲嘅嘢啦。
问：但听讲你地好犀利，讲完个宣言之后，可以忍得住啲眼泪，冇流出嚟，因为连啲宾客都话已经忍唔住喊。话听到0.5+0.5 = 1的时候。
陈展鹏：0.5+0.5其实我几年前已经睇到呢篇文章，都唔系几年前，十年前，我觉得好啱呀，即系以前系1＋1㗎嘛，0.5+0.5系非常之好，我都有同佢讲过，佢话睇到之后，佢话咦，喂，呢个就系你讲𠮶样嘢，其实我的意思系叫佢做0.5，咁我都要0.5啦，咁点知又真系咁啱有㖞，咁我地就立即改咗个誓词，所有嘢，都系跟个原稿，大约啦，所以系好有意思。
问：但都忍住可以唔喊？
陈展鹏：其实都有喊㗎，只系你哋见唔到啫。
问：即系单文柔都顶得住唔喊？
单文柔：因为佢有更加多嘅嘢令我感动，所以就留返，今晚你哋就会知。
问：今晚展鹏系唔系会预备咗表演呢？
陈展鹏：今晚都有表演，之前亦制作咗好多嘅片，拍咗好多片，我谂好多婚宴都系未见过。
问：你咁样讲完搞到我好好奇㖞！
陈展鹏：咁真系㖞，系送畀Phoebe的礼物来。
问：完咗婚宴会唔会畀自己放松下？
单文柔：呢一点我反而就未安排，但我就谂咗几个地方，但展鹏放咗假太耐喇，之前我哋又去咗英国、巴黎影婚纱相，所以真系要唞一唞，做下嘢先，再去都唔迟。
陈展鹏：同埋真系要睇个期啰，因为你都知啦，拍剧，一直延后，咁都要睇住工作啦，系时候真系要拍啲好嘅电视剧，好嘅角色畀观众睇。
问：成家立室下一件事都要开枝散叶，有冇谂过生B？
单文柔：都系顺其自然啦，因为展鹏的关系，都会影响到我，令我想生小朋友，但我暂时又冇话好有planning，都系睇下天意。
陈展鹏：顺住去啦，我当然想啦。
问：几多个？
陈展鹏：唉，唔好咁算命师傅。
问：佢话想生女先？
单文柔：之前有人同我讲话生仔、生龙凤胎，我都唔知要边样。
问：生晒啰！
陈展鹏：其实个机会率都算高嘅，因为通常唔系生女就系生仔架喇，可以龙凤胎嘅，龙凤胎就好似围骰咁嘅，亦都应该几准下嘅，你（记者）都应该可能系会生女先！
问：识睇咩你？
陈展鹏：估啫。
问：想再问下，戒指系边个拣？
单文柔：系我地两个一齐拣。
问：有冇啲咩特别，或者刻咗啲咩系入面？
单文柔：反而结婚戒指因为想成日带，所以都要揾一只展鹏同我都钟意，佢钟意比较狂野少少。
陈展鹏：真系嘅，结婚戒指系佢就我嘅，真系，因为传统果啲，我觉得，戴咗之后有啲唔太惯，咁我就问，会唔会有啲黑黑哋，结婚戒指会黑黑哋？之后大家一齐去揾，变咗个牌子都几特别几有意思，如果开工我哋未必戴，会挂住佢，好似个人咁，因为有时拍戏，好多人都唔明，我会挂住。