容祖儿大头虾快闪韩国　行街食饭劲甩漏：去食人参鸡点知变咗地盘

容祖儿（Joey）日前受化妆品牌邀请，快闪韩国，仲同韩国天团BIGBANG成员胜利见面𠻹。Joey乘机同同样受到邀请嘅老死黄伟文（Wyman）周围又饮又食又买，不过向来大头虾嘅祖儿喺当地亦都继续甩漏，真系好搞笑。

Joey虽然已经去过韩国四次，但从来都没去过“东大门”，“冇去过佢哋传闻中最神圣嘅东大门，㖊日食完饭，最后一个晚上，我闻到我嘅化妆师、发型师、助手，好似有一股想去东大门嘅兴致，我就话不如我都一齐去。”Joey跟大队处女踏足东大门，觉得非常新奇有趣。不过出名大头虾嘅佢，去Shopping都唔记得带钱，只能说不令人意外！“的确我系大开眼界嘅！因为𠮶度真系包罗万有，但最好笑嘅地方系我冇钱！冇韩圜亦都冇港币、又唔俾碌卡，最后我助手俾咗二千蚊我买嘢，哈哈，咁我就要拣得好挑剔、好审慎咁去买，买咗几对耳环。”

Joey 唔只Shopping 唔顺利，就连揾食都有甩漏，争啲搞到大家冇饭开，“㖊日做完嘢之后，我同阿Y谂住一人一日安排食晚餐。第一日佢安排，好好味，系一粒星嘅米芝莲；第二日我发板，我好鬼死老定带佢去我食开好好味嘅人参鸡补吓啦，点不知去到嘅时候变咗个地盘㖞！天气又愈嚟愈冻，我哋做完成日嘢未食过嘢，谂住求其揾个地址食，又揾极都揾唔到㖞，最后都系喺番阿Y之前俾我一堆餐厅嘅list入面揾咗一间，要成廿分钟车程先去到嘅一间烤肉店，所以最后其实𠮶间餐厅都系阿Y介绍嘅，哈哈。”