容祖儿成功取签证赴美参加阿娇婚礼　继续虾碌忘记带身分证

钟欣潼（阿娇）同台湾医生男友赖弘国（Michael）大婚在即，好姊妹容祖儿（Joey）日前被爆因美国签证过期而要缺席阿娇婚礼，被大家取笑虾碌无极限。当大家都以为Joey 今次真系要错过阿娇婚礼，替佢哋感到可惜之际，Joey 今日下午就喺 IG 贴出同Twins仲有郑希怡（Yumiko）嘅合照报喜，话佢经历重重难关，终于都成功飞到去美国参加阿娇婚礼，真系峰回路转！

Joey 于IG 贴出四人嘅淡妆照，写道：“傻人有傻福，经历了最惊险的四天，机票改了又改，寻晚出境又唔记得带身分证，在飞机又成晚瞓唔着，到步（埗）后仲唔见左（咗）顶帽，头大容量细的悲歌，总之过程唔重要最紧要结果，我终于在最后一刻拿到签证，可以给我最亲爱的娇一个惊喜，开心感动刺激兼而有之，我嘅人生好像过山车一样，祝明天一切顺利。#龙虎豹蛇”

睇嚟Joey 即使成功拎到签证，但依然不改虾碌性格，继续唔记得带身份证又唔见随身物品，不过今次有惊无险可以参加到由细识到大嘅BFF 阿娇嘅婚礼，呢啲“意外”却显得很微小，，感觉真系好圆满。