陈柏宇感动到喊住宣布 “隐世B女”出世：Abigail, I choose u!
撰文： 洪晓璇
出版：更新：
又有个靓靓星二代出世啦﹗陈柏宇（Jason）自宣布老婆符晓薇（Leanne）有喜之后，去到边都挂住BB喺口唇边，之前跟足西方传统切蛋糕公布腹中块肉系囡囡，“隐世B”呢日终于出世啦﹗
陈爸爸喺25号中午12点左右，上载一家三口合照宣布囡囡已经出世。Leanne最终选择剖腹产女，相片中应该仲喺手术室中，Jason兑现承诺入产房陪产，唔知有冇亲手剪脐带呢？BB女眼线好长应该系大眼妹嚟架，仲有好多头发添﹗陈爸爸留言话：“我一见到佢就忍唔住喊。Abigail, i choose u!!! (throws out pokeball)”
之前Jason做访问时讲过，囡囡预产期喺十月，依家早少少出世可以陪父母过中秋节啦。而留言中嘅Abigail应该就系陈小B嘅英文名，呢个名系希伯来文，意思系“她父亲的喜乐”以及“喜乐的泉源”，Jason都留言话一见到囡囡就感动到喊，呢个名真系相当有意思。之前Jason讲过会自制侍产假帮手凑女，仲早早请定陪月兼上堂学换片，相信嚟紧呢位好爸爸都有排忙啦。