【搭上高铁爱旅行】刘颖旋被陈展鹏整蛊？　“食完即刻反胃想呕”

刘颖旋（Tiffany）今日（6/9）一身休闲服饰，出席中环著名时装品牌活动。“今日系我第一次着阔脚裤，着出嚟又几好睇，效果好好，因为过往都系着贴身运动裤多，其实我对衬衫冇乜研究，本身我好简单，以前选港姐我都唔识化妆，所以打扮真系唔系我强项嚟。”

Tiffany早前拍摄无线旅游节目《搭上高铁爱旅游》，伙拍何广沛做主持，远赴中国内地6大地方，广州、桂林、汕头、厦门、杭州及北京，唔少得品尝当地美食。“今次我哋去咗6个唔同嘅城市，每一个地方都有佢哋特色，令我大开眼界，最深刻记得有次陈展鹏、何广沛叫我食‘啫喱’，食前仲要加啲酱油调味，食完之后，佢哋问我好唔好食，然后话我食𠮶个喺‘虫啫喱’，我成个人毛管戙即刻想反胃好想呕。”

游遍中国内地6大城市，拍摄时正值炎夏，Tiffany透露最辛苦喺桂林拍摄，因为当地有好多山环境好靓：“我哋好多时候会喺冇遮掩嘅情况下拍摄，我同广沛啲汗系咁流冇停过，天气真系太热，大家都拍到见头晕差啲中暑，好在剧组带咗好多水准备，觉得顶唔顺就上车休息下。”