林欣彤声音劳损死撑冇休息：担忧年尾演唱会失准

林欣彤（Mag）今日（12日）出席夏日派对活动，而Mag于现场讲说话比较细声，声音亦沙哑，发生乜事呢？Mag访问中透露系喉咙劳损：“其实我死撑咗一年了，之前同佢哋做舞台剧已经系死撑，𠮶个时候好痛，唔理唔理，死撑落去。终于知道撑唔系一个选择，所以俾心机休养，但我都有担忧，年尾系演唱会，不过我觉得呢个系上天俾我嘅任务，要系唔完美嘅自已身上做到最好俾大家睇，希望系呢一件事上全部人都攞到力量，所以我会好好照顾自己。”至于要休养几耐先可以好番？Mag直言需要一段日子，起码要几个月。希望Mag快好番用最好嘅歌声献俾大家。

声音劳损，令到Mag讲说话都要好细声，唔敢太用力，问到会唔会因为咁而经常唔开心？Mag直言会唔开心，但都学习到好多，“我觉得人生就系咁，每件事情都有好多面，亦都会有令人难忘嘅地方，我觉得呢一件事情系一个提醒，令我知道好多事唔好太搏命，我要学习爱惜自己，可能系个天想我喺众人面前克服困难，呢一件事就系最大礼物。”Mag同时好感恩身边朋友嘅支持与关怀。

Mag与天堂鸟成员Tyrese传绯闻已经一段日子，Mag声音劳损Tyrese亦有关心，Mag仲好多谢佢。今日现场玩游戏时候，众人强迫Mag与Tyrese一组玩游戏，会唔会尴尬？Mag觉得得冇问题：“我明白大家想要呢一个效果，冇所谓，大家开心就可以。”Mag强调二人只系朋友关系。