林作预告进军乐坛 孖师妹黄意雅唱情歌
撰文： 黄欣华
出版：更新：
林作做歌手？又搞边科呀？林作自从旧年放弃大律师执业后，就签范振锋做经理人杀入娱圈。除咗拍戏、做主持，仲返埋大陆参加综艺节目之外，佢日前就喺IG post咗张喺录音室嘅相，仲自嘲话：“为咗红，不择手段，连歌都唱埋，可耻！”
虽然林作为咗红，不择手段。但佢就话今次绝对唔系搞Gag：“今次好认真，唔系谂住搞Gag，系有去练歌㗎！MV都会拍，就嚟开始，但我个样出到嚟，人哋已经笑。”至于问到点解会有呢个谂法，林作就话：“其实旧年我签阿范嘅时候，佢同我讲话不如整首歌，我话好呀。但呢个idea一直搁置到几个月之前，填词人姜柠乐同歌手黄意雅又夹咗啲嘢出嚟，咁我咪贡献我把声啰！”
林作仲话自己一直好讨厌唱歌，但自问把声都OK，仲讲笑话：“不过沟得女嘅声，唱歌应该都OK。”除咗做歌手，林作亦透露嚟紧又会有新搞作：“我想嚟紧𠮶年接黄子华棒做栋笃笑，讲娱乐圈血泪史，攞呢首歌嚟做个前奏，但就仲未同公司倾”。林作连栋笃笑都想捞埋，唔知大家又Buy唔Buy呢？