【BB来了】李佳芯卢宛茵展婆媳大战 新抱奶奶永远睇对方唔顺眼？
自古以来最难解决嘅，就系婆媳纠纷，几乎所有长老健在嘅家庭都无法避免，早前就有调查指，新抱同奶奶最佳居住距离，系超过一小时车程。但香港地咁细，真系好难做得到。TVB新剧《BB来了》中李佳芯同黎诺懿本身住喺开放式单位，两公婆当然无问题，但意外怀孕后要揾屋搬，种种原因下黎诺懿希望搬到阿妈卢宛茵楼下，Ali非常大反应话：“要我搬去佢楼下，宁愿呢世都唔买楼 !”婆媳点解永远都对立？
【BB来了】女强人忽然Bingo做妈妈 李佳芯忐忑心情网友赞有共鸣
剧中Ali系相当有骨气，希望靠自己嘅女强人，由拍拖到结婚到有BB，其实一直得唔到奶奶欢心。身为阔太嘅Madam Lo亦恃势凌人，两婆媳刀来剑往，加上饰演Ali妈妈嘅陈秀珠，三个女人何止一个墟，简直似世界大战一样﹗唔少观众都话身同感受，莫非呢个世界真系咁多衰奶奶？
当众“唱”新抱
第一集奶奶Madam Lo出场，就系同一班阔太去到黎诺懿餐厅聚餐，喺众多朋友面前放箭，窒新抱先斩后奏旅行结婚，唔摆酒搅到自己无面；结咗婚又唔肯生仔嫌钱腥。好多观众都话拍拖时少见面好地地，到谈婚论嫁奶奶就会现形，由行礼形式到婚宴场地，甚至著咩衫都要干涉，真系唔知边个结婚。婚后想过下二人世界又日催夜催，网友不禁讲句：“咁想生不如你自己生。”
事事向钱看
老人家想抱孙其实唔难明，但系不停将“生BB就俾钱你地做首付”挂在口边，由几时开始BB变成一件货物一样，有价钱可以衡量？到两家人食饭，Ali诺懿话俾一万蚊象征式当租金兼家用，Madam Lo当住亲家面前大大声话：“我咁多钱使咩你俾啫﹗”难怪Ali都话就算有经济压力都唔想接受施舍：“唔想BB学佢咁，事事向钱看！”
干涉教B凑B
每对父母都有自己一套凑BB方法，有啲好紧张不停要消毒，有啲禁止小朋友3岁前睇电视，呢啲都系BB父母嘅选择，旁人都应该尊重。不过奶奶们经常觉得自己先系权威：“我咪又系咁凑大两个﹗”好似Madam Lo“好心”抢住埋单添置BB用品，点知就私下将Ali订嘅嘢改晒，仲大声夹恶话：“有奶使乜双泵，无奶嘅单泵就得；奶樽消毒器边及热水烚奶樽好﹗”
Ali最终妥协搬入奶奶楼下住，黎诺懿虽则同外母奶奶约法三章，两边都唔俾锁匙，凑BB方法一切以妈妈做依归，不过Ali被逼搬，妈妈陈秀珠又点会感受唔到，好在佢都不是省油的灯﹗两家人坐低食饭，企硬讲句：“点都唔会俾个女搬去奶奶楼下受气﹗”又买定大批BB用品，表明做Ali最强后盾：“女人有外家返先会矜贵﹗”作为准妈妈，听到呢句真系好warm好sweet﹗