【深宫计．专访】张文慈自觉学做人难过学做戏：有啲嘢唔好咁认真
提起张文慈 (Pinky) 呢个名大家会谂起咩？亚视？深宫计？于亚视出身的Pinky自2016年转投无线，以前在亚视做一姐的她，去到TVB却要做配角。她在最近热播的TVB重头剧《宫心计2深宫计》入面饰演汪司膳，戏份唔多但也有得发挥且令观众同网民留下印象，演技备受赞赏。Pinky直言拍这套剧是入行以来最辛苦的一次：“好辛苦不过好值得，呢部系自己从影以嚟最认真嘅制作，我试过连续8日无瞓过觉，好彩出嚟个样都仲keep到，做演员真系好靠意志力。”
问到Pinky觉得ATV同TVB有咩唔同，她说：“每个地方都有好同唔好，TVB嘅资源好够，各方面嘅条件都好好，ATV好多时都系one man band，但会有一种家庭嘅感觉。”
《深宫计》是一套讲宫斗同权斗的剧，尤其是讲女人之间的勾心斗角，正所谓多女人的地方就系是非之地，Pinky坦言：“未拍之前都有担心过会好多是非，但原来系无嘅。我哋四司本身都系有经历嘅人，唔会再话要斗啲咩，大家拍剧都系求开心，我哋仲成为咗好朋友，就算拍完剧都有约出嚟聚会。”
Pinky由1996年入行至今16年，唔少人会觉得Pinky曾经是亚视一姐，如今却只是演一些配角的角色，会好奇她是怎样去适应这个转变，对此Pinky说：“一姐呢啲好虚无飘渺，我自己一加入TVB就已经有晒心理准备系由新人做起，如果咁执著就好难喺呢行生存，同行之间良性竞争先系健康嘅现象嚟。”她直言现在心态已改变，以前确是会去争，争排位争出镜争见报等等：“我细个时无咩安全感，好惊无嘢做，好怕会被人遗忘，唔知点先揾到自己嘅价值，好惊会被人淘汰，依家完全无呢啲谂法，而系会好享受演戏嘅过程，有得演戏有得发挥已经好开心。”
Pinky话自己现在的心态非常之健康，非常之开心，唔会去比较，只求做好自己。她说：“依家个世代同以前好唔同，依家有好多网上评论，都唔好睇咁多，真假唔重要，好多时因为网友嘅误解，有好多批评令人睇完会好难受。我依家学识咗有啲嘢唔好咁认真，要识得调校自己嘅心理，学做人难过学做戏。要识得做人但我都有保留最真嘅自己，要自己揾个中间位，要自己觉得舒服，我唔可以无咗自己。”
Pinky签约TVB之前亦有一段日子北上到内地发展，众所周知艺人赚人仔一定好揾过赚港币，不过Pinky却情愿返港拍剧：“每一个人嘅揾钱能力都唔同，喺内地嘅机会系多啲，早几年我返咗内地工作嘅酬劳确系好过香港，但自己始终都系香港人，会挂住香港，想返嚟拍剧过下戏瘾，同香港嘅观众见下面。”
做演员总有辛酸的时候。她就话不想成日提住以前自己有几惨有几难挨：“做电视台艺人个个都系挨出嚟，我谂个个都会有遇过低潮时。自己入行头10年系最辛苦嘅，因为我系家庭嘅经济支柱，压力好大，压力大到会爆疮，个人仲有少少燥狂，系2010年信咗主之后先改变咗。我以前唔识控制情绪，又好内向，试过有次我喺ATV拍拍下嘢，突然走咗去匿入厕所，掩住耳仔大叫但又好惊畀人听到，当时觉得好辛苦，唔可以听到任何声音，我助手就喺外面拍门，我叫佢走话畀我静下啦，𠮶时其实我都有少少惊，唔知自己发生咩事。我唔想讲到自己好惨好唔掂，唔想望返转头，人系要向前望向前望要move on。”
摄：陈顺祯 化妆：Moon Wong 场地提供：香港九龙东皇冠假日酒店