【开心速递】单立文豹嫂结婚十年未生子　睇相被批2020年有小三　

豹哥单立文今日出席《爱・回家之开心速递》宣传活动，同一众老友记庆祝父亲节。豹哥同豹嫂胡蓓蔚结婚十年至今未有小朋友，豹哥早前仲自爆有知名相士指，如果2017年佢哋都未有小朋友嘅话，豹哥同豹嫂就会出现婚姻危机，仲话到2020年豹哥就会出现小三。

豹哥豹嫂一向系圈中嘅模范夫妻，对于被相士批佢哋之间会出现第三者，两人都以轻松态度面对，豹哥话老婆开始估定“小三”系边个，豹哥话：“佢已经开始估紧，缩窄紧范围，成日问系咪呢个，系咪𠮶个，边有咁快吖，其实距离相士所讲嘅时间仲有两年，成日问我系咪将会系呢个，我话个小三可能系‘啤啤’（剧中熊家所养狗仔）啰。”