【开心速递】吕慧仪囝囝开始一言九鼎　阿蟹：要欣赏小朋友创意

有个幸福家庭的吕慧仪（阿蟹），今日出席《爱・回家之开心速递》宣传活动，讲到就嚟父亲节，佢话佢屋企好重视呢个节日：“爸爸系一家之主，所以佢嘅节日要大肆庆祝，我几个月之前已经催眠阿仔，我话父亲节所有爸爸都大晒㗎喇，叫佢氹多啲Daddy。”

阿蟹真系一个好老婆，黄文迪娶到阿蟹真系好幸福，佢仲话每年都会同囝囝一齐准备小手工畀老公。囝囝依家三岁，阿蟹话佢进入一个每事问嘅阶段：“佢每日都问点解点解，一言九鼎，你同佢讲一句，佢顶你九句，例如问佢点解要画到份功课花晒，佢话：‘无得解，妈咪你再问我点解吖。’我问佢点解要油呢只颜色，佢话：‘无得解。’哈哈，成日铺个水氹畀我踩。”虽然听落激气，不过阿蟹作为新世代嘅父母，就好乐观面对仔仔成长嘅转变：“呢个世代嘅父母，对于小朋友嘅每一件事都应该抱住欣赏嘅态度，其实佢好有创意。”

阿蟹喺现实中家庭美满，但在剧中却系落单𠮶个，不过佢就透露嚟紧会有感情线，佢话：“我将会有一段神秘恋情，所以大家要密切留意。”