【商台灵异事件】郑裕玲顶帽离奇被摄上天花板　森美供出嫌疑犯

商台一向多“故仔”，近日再次发生离奇事件，就系有唔少员工放喺公司嘅帽第二朝都会被移去唔同嘅位置，据知林海峰同森美都有中过招，今次嘅受害者竟然轮到Do姐郑裕玲，真系老虎头上钉虱乸，非常大胆。

Do姐喺IG开直播，话返到公司，平日挂喺走廊嘅帽竟然唔见咗，后来先发现被人离奇摄在直播室入面嘅隔格顶同天花板之间，帮手揾帽嘅有麻利亚同陈柏宇。Do姐话呢啲事已经发生咗一排，“查唔到系边个，听讲阿Jan(林海峰)就话成日朝早都见到啲帽成日周围摆，森美𠮶边无人理，之后就到我哋。”

陈柏宇估可能系林海峰，麻利亚就推测有机会系夜更嘅同事，Do姐就估可能系阿占同Donald，不过麻利亚突破盲点话：“你觉得佢哋有咁高咩？”Do姐闻言话：“咁又系㖞，几个骑膊马都上唔到去㖞。”目测直播室个楼底都超过四、五米，就算阿占担櫈都摆唔到上去，令呢件事更添几分悬疑，究竟系边个咁大整蛊呢？

同系商台DJ嘅森美接受《香港01》访问，尝试解释呢个现象：“有时我哋放啲帽喺公司，啲清洁姐姐可能唔知就周围摆啦。”记者补充Do姐顶帽直头畀人放上天花板，唔似系清洁姐姐所为，森美闻言大笑话：“咁好肯定系顽皮嘅同事做㗎啦！如果𠮶个人知道顶帽系Do姐嘅话，我担保无人够胆掂。”森美话二台嘅同事一向都好顽皮，而佢更系当中嘅表表者，佢自爆试过将小仪对鞋挂上灯位度，等佢永远都拎唔到。不过森美话依家少咗返商台，应该少咗呢啲整蛊事件。讲起边个最大嫌疑，佢就话：“我怀疑系细So做嘅，呢啲整蛊人嘅事唔系我就系细So做㗎喇。”