【兵仔讲兵法】宅男打“芒亨”发围　唔使靓仔有钱都追到女仔

近日打机界热话《Monster Hunter World》，掀起了一片斩龙热潮，而对于宅男来说，打芒亨不但过足机瘾，最重要是终于可以展示到自己最强一面，尤其是呢只Game需要组队一齐玩，而且不乏女仔玩家，打机追女仔一举两得。

以往宅男沉迷打机，总被归类为唔够上进，浪费时间，要追女仔真系难过登天，但自从最新版本芒亨推出后，大家可以尽展自己所长，首先现实嘅你唔够潮、唔够In，无问题，帮个角色整返个靓仔样，钟意似刘华又得，似TFBoys都无难度，话晒出来行走江湖，Image都几紧要，起码第一印象唔会差先。

老实讲虚拟世界雌雄莫辨，以为对方角色系女仔，真身可以系麻甩佬，而芒亨嘅好处就系要戴咪先可以对话，起码同你组队嘅女仔，唔会另有性别先啦。至于有玩家用变声器来打机，遇上这种摆明玩嘢嘅人，都只能怨句唔好彩，等于大家拍拖，都唔一定遇到好女仔，但总叫有个识到女仔嘅机会。

相关文章：

【兵仔讲兵法】女神宁愿拣运输兵　储首付买楼等于孭廿年债？​

【兵仔讲兵法】追到女神就好幸福？　之后相处先知味道

【兵仔讲兵法】情场唔止蚀只因唔忿气　跳船再入货先系王道

以前上网打机，要玩得劲课金就唔少得，即是越有钱玩得越劲，但芒亨就真系要靠自己实力，材料装备武器全部要慢慢打慢慢储，有血有汗先可以升呢，仲有斩龙嘅技巧都要苦练，同女玩家互相研究，感情肯定可以大跃进。最后一个超级秘技，非必要时都唔好咁做，就系静静鸡买个高手帐号，孭住一身高端装备去屠龙，肯定引来不少羡慕目光，仲可以系女玩家面前威威，不过咁做就失去咗玩芒亨嘅乐趣啦。