【万千星辉】汪明荃爆seed讲艺员心声：加人工、山头文化少啲
《万千星辉颁奖礼2017》有一个50周年的光辉大奖，叫做送畀台前幕后全部人员，由开台功臣罗仲炳先生同埋汪明荃汪阿姐分别代表幕后和艺员领奖。罗仲炳说：“我好荣幸可以代表所有幕后同事领奖，TVB 1967年开台，其实我喺1966年已经加入公司，可以话睇住公司出世。我哋历年咁多位幕后同事，同公司一齐打仗，讲起打仗，我印象仲系好深，因为1977年时电视系好竞争，呢场仗最后我哋赢咗，因为全公司上下一心嘅拼斗，我就系叫TVB精神，亦系TVB嘅秘密武器。多谢公司经常俾幕后员工发挥，亦好接受我哋意见，令我哋创造咗好多项目，好多谢公司今次颁奖，证明我哋嘅努力。”
相关文章：
【万千星辉】唐诗咏终夺女主角 喊住多谢田蕊妮：听我呻又陪我瞓
汪阿姐就咁讲：“呢个奖好特别，系今年新增嘅奖，好多谢TVB重视人才，我好荣幸代表过去50年有份参与嘅同事拎呢个奖。我1971年加入TVB，47年来我见过接近1万名演员，有啲已经系国际巨星，有啲继续打拼紧，有啲好可惜离开咗我哋，但系仲好多新面孔继续接捧。我哋每一位喺TVB都付出好多努力，因为我哋知道做乜都好，最紧要系对得住观众，所以每一位同事拎呢个奖都系实至名归。作为一个艺人我很感激TVB，呢度系一座少林寺，畀机会去发挥，但我都同时亦希望大家唔单止要做好本份，仲要不停增值。而家市场好大，TVB要继续带领整个市场，需要我哋台前幕后团结一致，一齐打呢场仗。呢度我再次代表各位艺人，多谢公司俾我哋肯定，亦希望公司好好珍惜每一位，虽然我哋好挨得，如果公司人工可以加多啲啲，休息时间多啲啲，关心多啲啲，山头文化少啲啲，一定可以留到更多人才，士气更加高涨，我哋可以好自豪咁讲我系来自TVB！希望我哋可以台前幕后上下一心同TVB创造更精彩嘅第二个50年。”相信汪阿姐讲出唔少人心声。
相关文章：
【万千星辉】非戏剧奖全部大热 《do姐再shopping》拎奖好正常