【渣打马拉松】徐荣通宵开工直接跑半马　胡诺言再战全马志在参与

每年渣马都系运动界盛事，数以万计热爱跑步嘅人都会不辞劳苦，凌晨就到起点做热身准备参赛。两位爸爸级艺人徐荣同胡诺言，今年分别参加半马以及全马赛事，由于平时都有Keep住跑步所以都信心十足，不过徐荣开完厂无瞓过直接到场参赛，完成赛事后接受《香港01》访问时就话：“真系唔够瞓好辛苦。”

【渣打马拉松．多图】蔡思贝半马劲快跑完：比目标时间快咗2分钟【渣打马拉松】余德丞相隔4年再挑战10K赛：如果半马就太辛苦

徐荣赛前预计自己完成时间大约系2小时，最终以1小时59分刚好达标，接受访问时就话：“状态一般刚拍完戏收厂，无瞓觉就过嚟，真系唔够瞓好辛苦。自己真系未跑过，边啲位要停，落斜系要放慢少少都唔知，好在有朋友傍住指点。西隧𠮶段最甘，足足两三公里，下年应该会挑战全马，睇下工作情况啦，如果开紧剧唔够时间训练就报返半马，但自己就希望试下跑全马。”

而第二年参加全马比赛嘅胡诺言，全副装备早早到场热身，佢就好过徐荣少少，之前一晚唔使开工，访问时就话：“正常之前𠮶晚要早啲瞓，自己十点几瞓但瞓唔到，因为个仔又喊下个女又嘈下，不过状态都好好嘅。预计时间4小时内，自己唔系职业运动员，都系钟意跑步想参与下，总算系香港一大盛事呀嘛。最近忙紧拍新年节目同埋《包青天》，准备马拉松都唔可能系最近嘅事，训练咗一年时间，可能一星期跑一至两次8至10公里，临近几个月就跑长啲大约30公里。不过近两个月真系忙啲少咗练习，尽力啦。”