【性在有情】张兆辉快餐店传授性教育　解释Condom用法吓窒街坊

喺香港呢个文明社会，先似开放自由，但有啲词好似佛地魔个名一样，一讲出口大家就会定格，大家都避之则吉，其中一个就系“性”。拍咗成年曾经喺my TV SUPER播放嘅《性在有情》，终于喺翡翠台首播，当大家都在留意有几多床上戏激情戏时，有无谂过从中学习点样正确面对性教育？就好似张兆辉喺戏中所讲：“正确嘅性知识系好健康嘅，唔使怕，唔明就问。”

戏中饰演社工嘅张兆辉，与性治疗师女友陈敏之，同一般香港人一样，面对想交欢又无地方嘅困境，难得等到家中无人可以翻云覆雨，但唔小心漏低一个避孕套，俾就读小学嘅囝囝拎返学校当水球玩，仲要掉中老师个头，唔使问当然就系要记过兼见家长。普遍香港家长，应该会大闹小朋友，不过张兆辉同陈敏之就反问老师“小朋友只系好奇，点解要记过。”仲劝老师应该及早向学生灌输性教育。

讲就容易，识得实行嘅又有几多个？戏中张兆辉就喺快餐店即席同囝囝解释何谓Condom：“避孕套其实系俾男仔同女仔发生性行为时所用。（咁咩叫性行为？）你有无睇过非洲动物纪录片？性行为就好似非洲大象交配一样……（咁男仔点解要用避孕套？）一方面用嚟避孕，另一方面可以防止喺性行为中感染传染病，但即使你用咗Dom Dom，都唔可以随便同异性发生性行为。（咁避孕套入面装咩架？）当然唔系水啦，系用嚟装男仔嘅精液，等精子唔能够游到女仔嘅卵子结合。”

呢一段性教育讲解简单易明，不过大部分人都好似张兆辉身后嘅家长一样，不停逃避，盖住小朋友耳仔唔俾听唔俾问，最后仲鸡飞狗走。其实小朋友都系想得个知字啫，吓吓避忌净系话“大个就会知”，倒不如持开放态度灌输正确观念啦。