【万千星辉】艺员互选TVB视帝视后　过半数推马明称帝

TVB昨日 (7日）宣布《最佳男/女主角》及《最佳男/女配角》，虽然提名名单花多眼乱，但大多数的艺员心目中已经有晒心水。《香港01》就问到接近二十位艺员，他们投票选男主角及男配角都有明确意向，大多投马国明做视帝，而男配角方面，几乎所有人都投张振朗。

讲起视帝，今年都话系马国明与王浩信之争，但讲起二拣一，都系拣马明！虽然马明自嘲话：“大家其实都系想睇我食白果个样多啲！”但至少他的女友黄心颖会支持她：“梗系拣马国明喇！我好钟意睇《降魔的》！除咗我，我身边啲人都好睇好佢，都同我讲，觉得佢今次做得好好呀！希望佢得喇，好替佢紧张！”

除咗女朋友之外，视后级及前辈级人马都好支持马明，就好似鹫哥，佢直接点名：“我投畀马国明，因为我有同佢踢开波，就觉得佢踢波同做戏一样，态度都好认真，今次都做得好好，就投畀佢喇。”而家燕姐都一脸认真就讲起马明：“佢做得真系好。佢呢个角色唔知系咪真实嘅佢，做得好入型入格。（好似的士佬？）哈哈，系呀！”田蕊妮虽然与萧正楠好熟，但都有留意马明的演出：“阿萧就等多年喇，唔想再见到马明佢天然呆喇！”而视后之一的定欣就话视帝太难拣，拣咗三个心水，当中都有马明，反而就冇好拍档陈展鹏啰‧‧‧‧‧‧

另一方面拣选王浩信的少众，包括蔡思贝及岑丽香。蔡思贝就同过马国明及王浩信合作过，但她依然投给传过绯闻的王浩信：“因为盲侠呢个角色唔易做，佢都落咗好多心机，加上《踩过界》剧本咁好，所以都系投畀浩信喇。”香香就非常可爱：“我唔识睇中文，但拍咗45集《溏心风暴3》，所以就认得呢四个字，咁我就投王浩信喇！”而《踩过界》的张振朗，是男配的大热人选，觉得他非常投入角色，把谷一夏发挥得淋漓尽致。

至于女配角及女主角奖方面，反而没有呼声最高的角色，女配角最多讲起姚子羚。姚子羚更扬言不会投票给好姊妹胡定欣：“佢拎得好多次喇！”而王君馨又话唔投鲍姐：“佢都系拎返电影嘅影后喇，佢好高层次！”其他都是自己剧投畀自己人，没有太大惊喜。