【使徒行者2】飞机哥张景淳入行14年　仍然等机会：著眼点唔系钱

《使徒行者2》播了一个星期，反应都算好，戏中除了一众主角出位之外，有一些配角都值得留意，就好像Victor（陈豪饰）的手下飞机－张景淳。

一头长发，在剧中以打手形式出场的张景淳，有不少网民话一见到佢就觉得好有陈浩南影子，究竟是否有所参考当年郑伊健的造型呢？在接受《香港01》访问时，他说：“我都见到好多人都有讲似陈浩南，但系的确系无参考过，因为我本身都系长头发嘅，咁我拍之前我又唔想剪，就问监制可唔可以keep住呢个发型。当时我试镜一个警察角色，但监制话我发型都系似古惑仔多啲，所以就转咗做长兴头马呢个角色。到我第一日造形，佢哋已经预备好晒啲衫，但其实我戏中身边嘅兄弟都系呢款衫，俾到错觉大家可能都系因为个发型。”不过其实这个造型跟电影《黑社会》入面的张家辉更为相似，除了一样以皮褛和打手做招徕，连个名都一样，点解？因为两套都有叶天成做编剧嘛！

入行十四年，当初由刘德华所属的加际唱片公司力捧的男女实力新组合Cheers出道，09年进入TVB，一直以后都是一些跑龙套角色，多年来只有一套《天与地》的家明为人所熟识。演员的生命虽然可以好长时间，但一直都不能上位，会否想过退出？他说：“其实我自己觉得演员真系好被动，好睇你接到啲咩角色，𠮶阵接到家明呢个角色系好适合我去做，所有嘢都好符合我当时嘅条件，喺天时地利人和都好嘅情况吓，的确系做到啲回响出嚟。之后我一直都有努力，尝试去做唔同嘅角色，我觉得要等一个好嘅机会，其实每个演员都系等紧呢样嘢。好似《使徒行者2》同《飞虎极战》我都系做一个反派嘅角色，都系有动作场面，有打有飞车，我都会试吓亲身上阵，基本上大部分都系自己完成，当中当然都会有受伤，但我都想做好件事。戏入面我未必会有一条故事线，但起码我出现𠮶阵都会有啲动作场面，希望大家会钟意，见到第二面嘅我，我就系咁样去进步。”

家明虽然令Stanley成功令观众留下印象，不过大家只就将他变成了家明，真正认识他的人少之有少，Stanley感叹：“其实以前叫亲我嘅十成都系叫家明，而家好少少，可能有4个叫家明，2个叫我个名，其他都仲系唔记得我叫咩名。其实我都有谂过家明究竟系帮咗我，定系帮我定咗型，但系如果唔系家明，我根本无机会爆出。一来我唔系演艺出身，二来其实我私底下唔识争取，唔识去表现自己，我通常都系坐喺度等，只可以透过角色去等监制留意我，所以觉得家明始终都系帮我多过压住我。”

既然一直都未有所成，留在这里的原因主要就是一直以来对演戏的执著，那道火在Stanley心中依然燃烧，他说：“我本身唔会觉得一定要去到好成功先可以留喺呢一行，或者留喺呢间公司嘅价值，因为我见个自己偶像祥哥（黎耀祥），佢自己成功嘅时间都系有佢自己嘅timing，姐系我讲紧一啲成功比较晏嘅晏子，德斌都系其中一个。所以我觉得每一个人都自己嘅timing，每人都有自己嘅机遇，最紧要自己系咪enjoy紧𠮶样嘢，一日有机会俾我做戏，我都会继续留喺度。当然我都有谂过人工嘅问题，不过而家都维持到生活嘅，我都有做埋主持，基本上都维持到生活水平。不过我嘅著眼点唔系钱𠮶方面，反而系做戏希望有成绩，我仲系未死心架，有啲嘢点都要等一阵。所以我都要另一半理解呢样嘢，要揾一个可以同我一齐挨嘅女朋友，咁我而家无女朋友喇，压力都低啲，如果有都要俾佢知道我嘅状态。屋企人都好支持我，我妈咪好钟意见到自己个仔喺电视出镜。”老土讲句，机会系留俾有准备嘅人，十年磨一剑，可能下一套就会是你当上主角，加油！他的名字叫张景淳。