【TVB Secrets】临时演员要做埋搬运　判头无奈：我哋平过咕哩

上篇提到TVB临时演员，要著超臭戏服开工，辛苦钱绝对不易赚，最重要是钱不多，未实施最低工资时，TVB临时演员日薪180蚊，甚至100蚊１０小时工作，但立法后，临时演员时薪为34.5，原本法例是保障了他们，因为剧组以往一落单就９小时，照新例实施后，每位临时演员日薪180蚊升到310.5蚊，但其实现在大部份剧组落单，只会用６小时，亦即是207蚊。

判头阿强（化名）说：“6个钟唔包食饭𠮶个㗎，剧组放饭𠮶个钟，冇钱，但我哋俾饭盒，多数叉烧饭，有时双拼，仲有冻嘅汽水，呢方面无线叫好好，再津贴15蚊，好人啲嘅公司就20蚊啰。加班有冇补水，有呀！咪照计啰，继续最低工资34.5。”饭钟不计钱，听落有点没人性，但其实判头亦不想当衰人，但因为无线只给判头大约45蚊一个钟，判头只能赚10.5的差价为生，他说：“一个赚得10.5，无线而家有几可拍千军万马？过百老临？有人落张单book 10个呀，都要还神呀，我哋都想俾多啲班细，但我哋都要开公司、灯油火蜡，唔好话有冇肉食，为到皮都叫做好叻仔喇，所以越嚟越小人做，你做份保安都人工高过你，又舒服过你，你点揾人啫？以前好多新移民做，而家佢哋都识谂啦。”

而最令临时演员判头苦恼的就是保险问题，阿强说：“呢啲偏门边有得买保险？有㗎，但我哋边有钱买？开工，真系要自求多福，如果有同事受伤，都系我哋同佢哋拆，因为临时演员系外判嘅，所以早几年（2011年）我哋因为呢件事同无线嘈过㗎，就系临时演员保险问题，但当然倾唔掂啦。”而临时演员还有一个价目表，就是跳海加几钱？讲对白几钱等，他说：“讲对白就当有戏做啰，𠮶表写明加半工，如果剩系闹几句“正衰人，奸商。”咁就唔收，真系有戏做，咪多20蚊啰，不过好多导演都肯俾嘅，因为佢哋都知我哋辛苦钱，有时我哋要帮手攞嘢添，旧时如果拍大坛嘢或者多道具，会特登book多几个临时帮手搬嘢，当咕哩用啰，都系照计时薪，再俾多少少，唔啱规矩㗎，但好声好气，真系冇所谓啰，我哋都系想快啲开工快啲收工啫。”