《天地豪情》边个最惨？　蔡少芬死无全尸　陈锦鸿累死宣萱最内疚

《天地豪情》重播又重播依然大把人捧场，今晚嚟到大结局冇乜边个有好收场，睇咗咁多集你又觉得边个角色最惨呢？网友意见就认为蔡少芬惨被张家辉碎尸最可怜，陈锦鸿间接累死宣萱应该内疚一世，亦有人同情张家辉突然一无所有而变成丧心病狂系最可悲。

《天地豪情》可以话死得人多，每个角色性格鲜明，亦造成佢哋得到呢个下场，睇得观众最心痛嘅可能系蔡少芬饰演嘅Diana，佢为咗搜集张家辉（甘量宏）嘅罪证，甘愿假扮爱上对方兼订埋婚，可惜俾张家辉无意间识穿，结果被他杀死兼碎尸，最惨系一啲证据都得唔到，死得唔抵！

陈锦鸿演程家雄为人天真戆直，一直唔愿意同宣萱饰演嘅Kelly一齐调查张家辉，后来宣萱虽然获得证据但系俾张家辉买凶杀死，陈锦鸿可以话间接累死Kelly；之后又知道Diana原来为咗救自己而被碎尸就更加内疚。

全剧最抢戏嘅张家辉不断杀人、杀人、杀人，其实佢嘅角色都几可怜，明明出身大富之家，点知原来系穷光蛋，追女仔又失败，以为心爱嘅女人狠嫁自己原来又系假，坏事做尽结果得到报应，听落又几可悲！

演技派罗嘉良饰演大头文，嗜赌成性，输咗姑妈间餐馆都未够，连女友姚莹莹（Apple）爸爸间餐馆都输埋，落泊由加拿大返香港借钱还赌债，有个好女友Apple，点知佢患上血癌，为免令大头文担心，Apple隐瞒病情又讲大话已嫁人，罗嘉良爱上郭蔼明（程嘉鸣），后来Apple死后至知道实情，就同嘉鸣分手，不过佢算几好彩，最终同嘉鸣复合仲结埋婚，所以最惨𠮶个其实系Apple。