【壹号皇庭】深宵剧场最终决定　郑秀文王菲25年前好青涩

当TVB剧集收视唔理想都可以被腰斩/调时段，讲左播但未播，最后被抽起都真系无佢符嘅。讲紧系宜家唔少人追看嘅凌晨时段，《天地豪情》最后两集，但接捧嘅戏一改再改，由一开始传会播《天地男儿》，出节目表时话系《鉴证实录》，点知出埋节目表都仲未改完，最新又话播《壹号皇庭》，究竟调完未架？TVB外事部已回复，今次坚嘅﹗

之前《三生三世十里桃花》，话播又唔播改足几次，今次就轮到凌晨时段啦。早几日出左9月7日节目表，写住下午11:55播《鉴证实录》第一集，转个头又发现节目表同时段变左做《壹号皇庭》，令一众男儿迷同鉴证迷表示劲失望，亦令大家非常怀疑，到底今次系咪真架呢？

TVB外事部回复香港01查询时表示：“电视台节目调动乃正常现象，继《天地豪情》于九月六日大结局后，翡翠台将安排播映《壹号皇庭》系列剧集，九月七日先播13集《壹号皇庭》，九月二十日（星期三）则播映《壹号皇庭II》。”好啦，官方回复，播完第一辑播第二辑，大家可以慢慢煲啦。

讲番《壹号皇庭》，同系列五辑剧集，第一辑于1992年播出，咁就已经过左25年，主演嘅艺人粒粒皆星，故事以欧阳震华(余在春)、陶大宇(江承宇)、苏永康(周志辉)、蒋志光(周少聪)及骆应钧(周文彬)等人为主，女角方面，陈秀雯(丁柔)、郑秀文(方家琪)、刘美娟(江承宙)、第二辑的王菲(唐毓文)等等。

七八十后对律师嘅印象，大都来自呢套剧集，工作时雄辩滔滔，放工后落pub食花生摸酒杯底，唔少律师朋友都话，呢套戏嘅影响力极大，到宜家大众都以为佢地做律师真系咁样样。同时亦开创以专业人士作题材嘅剧集先河，之后嘅《妙手仁心》系列仲有《刑事侦缉档案》系列等，都系由此而起。

单系揾到sammi同王菲两大天后参演，已经系前无古人后无来者，绝对系可一不可再嘅阵容。虽然sammi同阿菲分别喺第一辑同第二辑出现，不过有个共通点，就系先后喺剧中做阿辉（苏永康饰演）嘅女朋友。当年嘅Sammi仲系包包面，而阿菲就仲系长头发，实在系令人怀念呀……

除左剧情以及演员吸引，呢套剧嘅主题曲及插曲都极非常用心，主题曲起用英国Dire Straits嘅“Your Latest Trick”色士风独奏，我咁写包单，呢只歌一响起，煲剧回忆即刻返晒嚟。不过近期无线重播兴改晒d配乐同歌曲，呢只经典歌保唔保留到都仲要等播出先知，宜家即时俾大家重温一下：