【3日2夜】张曦雯keep fit唔需要戒口：最钟意食汉堡包同薯条

拥有“打机女神”称号嘅张曦雯（Kelly）人靓身材好就系人都知，尤其是近日TVB播出的节目《3日2夜》中，Kelly就带观众到毛里裘斯感受阳光与海滩。但不少女观众就似乎将焦点放在Kelly嘅美好身段上，究竟要点样keep fit先可以有佢咁好身材呢？张曦雯接受《香港01》访问时就话，“钟意食咩就食咩系最好，但要适量咁食，咁样自己会开心啲！”

Kelly透露一起身之后会饮暖嘅姜沟蜜糖嘅水，之后先再食早餐，“其实我觉得如果减肥只可以食一样嘢，反而会反弹得仲快，因为你之后狂食返钟意嘅嘢会仲唔好。”相信大家身边都有唔少朋友几乎日日都讲话要减肥，方法仲层出不穷，Kelly都话以前自己都系咁，“一路都试过唔同on diet嘅方法，但我最后发觉钟意食咩就食咩系最好，虽然咁样可能唔系最佳效果，但要记住系适可而止咁食，等自己开心啲，唔会太大压力。”咁连女明星最避忌嘅热气嘢都照食？Kelly就话，“我自己最钟意食汉堡包同薯条，无话特别戒口，食完自己会开心咪得。”

但最估唔到嘅系原来女神张曦雯都试过体重高达150磅，“𠮶阵我16，7岁都系肥妹仔，虽然我高，望落去就好大只。”咁点解之后会的起心肝减肥？她笑言，“因为我家人见我越来越过分（体重），所以就命令我去减。”减肥中一定会遇到嘅问题就系减到一定程度，就好难再减到落去，Kelly话当年都系咁，“有一排瘦左，但之后又肥返，反复咁出现。但后来揾到啱自己嘅方法，就系之前讲嘅钟意食咩就食咩，就一直keep到而家。”她其后亦表示爸爸系超级健康嘅人，“佢而家虽然50岁，日日都去做运动，都有6嚿腹肌。”连爸爸身材都咁好，唔怪得知Kelly而家可以有女神称号喇！！

Kelly指现时体重120磅，腰围就有23吋，但留意返她身高有175cm，其实真系超级fit，佢就话平时唔会特别磅重，“生活都系开心姐，磅多两磅又唔开心，我觉得咁就唔系几好。平时著开嘅衫仲著到，望落去又ok就可以。”

提到今次Kelly就疑似有艳遇，就是节目中有位身高190cm嘅外籍男士陪玩，Kelly透露对方有同自己交换Facebook，“其实交换完之后都无咩联络，咪当多咗一位毛里裘斯嘅朋友，如果可以有机会再见佢，都可以揾下佢。”讲到Kelly间中都有绯闻，但一一都被她否认，问到系咪对男友有好高要求？Kelly就话，“无特别话要咩肤色，种族嘅人，香港人都OK，最重要沟通到，要睇下𠮶个人系点，唔系对香港男仔抗拒。”

最后Kelly都透露今次全新一辑《3日2夜》播完之后都会继续开拍，仲话一定要参与，“我最想去加勒比海嘅小岛，最好就系有架邮轮载我地去每一个岛，因为𠮶度真系好靓，同埋可以潜水。”