【童年回忆】《闪电传真机》聚会　谭玉瑛姐姐号召力强一围变六围

“循环不息的宇宙如在照顾著地球……”如果睇到呢句歌词觉得系有声POST，咁你就唔觉意曝露咗年龄秘密啦！90年代最受欢迎儿童节目《闪电传真机》主题曲，当年几乎个个小朋友都识唱，放学4点冲返屋企睇电视嘅回忆，真系谂起都不禁会心微笑。播出十年间有唔少经典环节，无论主持或小童星都令人印象深刻，日前佢哋举行聚会，台前幕后足足67位出席，你又认得几多位呢？

《闪电传真机》由1989年9月接替《403穿梭机》，一直到1999年大除夕播出最后一集，整整十年时间，主持人包括谭玉瑛、麦长青、黎芷珊、黄智贤等，带住小童星们演出一个个富趣味及教育意义嘅环节，好似《Auntie乌卒卒》、《叉烧包与汉堡包》、《僵尸爷孙》、《麦氏侦探社》、《认字特警》等。

眨眼间节目已经完结了十几年，原来一班台前幕后都仍有KEEP住联络，8月19日晚更于尖东一家酒楼举行“搞大咗《闪电传真机》同学会”，现任奇妙电视主持黄芳雯（Paula），原来当年系节目小童星之一，见返一众童年好友同大哥哥大姐姐，佢都表示非常兴奋：“其实咁多年来，传真机各个唔同组别，好似我地小演员同啲主持、制作组等，都会约食饭饮茶，不过今年真系第一次咁齐人，足足有67位﹗”

Paula表示本身预计一围食饭，到最终筵开六围，估计因为订好日子后，谭玉瑛姐姐一早确认会出席，所以大家都特别踊跃，个个话想带多一两位，就变到咁墟冚﹗“大家都好有心，我提议整banner俾大家影相，anna姐姐话环保啲不如利用场地萤幕，揾佢囡囡帮手整logo。仲有呀，无谂过去聚会都好似婚宴咁有大家成长片段睇，不过唔系一对新人，而系有幕后人员将在场人士当年嘅相同片剪辑埋一齐，足足有成7分几钟﹗”

现场仲有切饼仪式，个大蛋糕居然系谭玉瑛嘅作品﹗身为美食节目主持嘅Paula都大赞好食：“个蛋糕系谭玉瑛姐姐亲手整架﹗之前佢都无出声话想俾个惊喜大家，系个榴梿蛋糕足足五六磅重，仲好好食添﹗”Paula话大家都玩得非常尽兴，希望每年都gather一次：“好多人睇完Facebook都问点解唔叫埋佢﹗睇嚟下次要Book多几围啦﹗”