【童年回忆】《闪电传真机》聚会　谭玉瑛姐姐号召力强一围变六围

“循环不息的宇宙如在照顾著地球……”如果睇到呢句歌词觉得系有声POST，咁你就唔觉意曝露咗年龄秘密啦！90年代最受欢迎儿童节目《闪电传真机》主题曲，当年几乎个个小朋友都识唱，放学4点冲返屋企睇电视嘅回忆，真系谂起都不禁会心微笑。播出十年间有唔少经典环节，无论主持或小童星都令人印象深刻，日前佢哋举行聚会，台前幕后足足67位出席，你又认得几多位呢？

《闪电传真机》由1989年9月接替《403穿梭机》，一直到1999年大除夕播出最后一集，整整十年时间，主持人包括谭玉瑛、麦长青、黎芷珊、黄智贤等，带住小童星们演出一个个富趣味及教育意义嘅环节，好似《Auntie乌卒卒》、《叉烧包与汉堡包》、《僵尸爷孙》、《麦氏侦探社》、《认字特警》等。