【任噏乱评】《阿爷厨房》逼住睇谭玉瑛做主持　有得拣你会点拣？

香港人最钟意饮饮食食，所以大台嘅综艺节目都离唔开去煮嘢食同去旅行，前几日爆红嘅《阿爷厨房》Season2终于开播，之前上季个个都弹谭玉瑛可能做得儿童节目多，时不时都在鼎爷（李家鼎）煮𩠌𠮶阵插嘴讲嘢，网民就闹爆话佢好嘈，网上仲流传拍𠮶时鼎爷都忍唔住爆粗闹谭玉瑛，最后要靠后期剪走。究竟系真定系假就冇人知，鼎爷多次接受访问都话佢哋两个合作好愉快，但无论网民点闹，第2季都继续用返谭玉瑛，唔通真系冇得拣？

一讲起大台烹饪节目，就会谂起鸡汁May姐、淑仪姐、肥妈、鼎爷又或者李锦联，肥妈因为拍《食平D》同陆号（陆浩明）合作，仲Friend到上埋契，都算系最成功嘅一个组合，而李锦联同大王（安德尊）因为做《都市闲情》主持时成日斗嘴，畀制作人睇中搞咗个叫《区区开伙》，睇𠮶阵都觉得佢两个“戏假情真”。

如果个天俾个机会我返转头嘅话，我会将佢哋几个大兜乱，肯定会好有火花！

食花生首推：鼎爷X安德尊

鼎爷虽然刀功好厉害，但佢嘅脾气都唔惹小㗎，就好似杨千嬅首歌咁：“别人都知道我火爆，直行直横不守礼貌”，鼎爷唔做作有𠮶句就会讲𠮶句，但大家就系钟意佢直肠直肚嘅性格，仲觉得佢好Man添！而安德尊唔知系咪节目效果，成日都见佢撩事斗非，作威作福咁，上礼拜喺《安龄暑假冇时停》度大虾细，系咁质宋芝龄食熊猫零食，搞到宋芝龄块面谷到红晒，网民个个就闹爆叫TVB裁员第一个就要裁走佢！鼎爷火爆性格，遇上安德尊撩事斗非，现场肯定火药味好重，但两个都系老前辈，都唔知帮边个，打个和啦，到时节目出街肯定不停消音，系咁“嘟”、“嘟”、“嘟”......

争嘢讲推介：肥妈X谭玉瑛

谭玉瑛喺儿童节目四朝元老，主持过《430太空梭》、《闪电传真机》、《至NET小人类》、《放学ICU》，横跨70后80后、90后嘅童年回忆，大家谂起以前睇儿童节目，脑海都仲有谭玉瑛把声，真系好洗脑！《阿爷厨房》大家弹佢太嘈成日抢住讲，其实佢做咗几十年主持，讲惯嘢都好正常嘅，而肥妈喺《食平唔知几多个D》入面，又系做主Key讲嘢，成日都听到佢把声系咁窒陆号，充斥成个节目呀真系！如果肥妈同谭玉瑛一齐主持，肯定两个会系咁争嘢，当肥妈觉谭玉瑛太嘈嘅时候，对住佢用巨肺唱一句：“嘥气……”，都应该几搞笑。

Dead Air推介：李锦联X陆号

李锦联本身喺《都市闲情》教煮𩠌，其实都好低调，每日好公式化咁教大家煮几个家常便饭，但就系因为大王成日撩佢，两个互窒就变得好有火花，但单独睇佢一个呢，就真系冇咩味道，佢系一个需要人带动嘅绿叶角色。而陆号同李锦联一样，都系需要有人同佢唱双簧，即系肥妈闹佢一句，佢又笑笑口厚面皮去氹肥妈，如果冇咗肥妈系度，陆号自己一个讲嘢畀人感觉就好油腔滑调，成件事会好Over。如果将李锦联同陆号摆埋一齐，冇咗个主Key带住，我估佢哋都会好客气咁等大家讲嘢，成件事会好尴尬，但睇佢哋疯狂Dead Air都几有趣味性。

其实都系FF吓，大家都系准时十点半睇返鼎爷同谭玉瑛嘅《阿爷厨房》啦。