伍富桥被网民恶意评击　爱妻Shirley渐睇得开：冇以前咁嬲

林希灵今日（8/1）以嘉宾身份现身荃湾有线大厦出席HOY TV节目《开饭啦》录影，并由伍富桥爱妻Shirley（梁兆楹）亲自教煮美味菜式。林希灵接受《香港01》访问时表示：“本身我嘅家庭系‘无饭家庭’嚟嘅，而最近我哋又搬咗屋，住咗两个月先发觉我哋系冇开煤气，同埋冇申请煤气。本身我同Shirley系好朋友，去过佢屋企食咗好几餐饭，全部都系佢煮，而且每次款式都系好唔同，对佢嚟讲系绰绰有余，佢煮嘢食都系好叻。”

Shirley接著说：“其实唔同嘅国家嘅菜式都会识啲，但就唔系话好精，自问入厨经验又唔系真系好耐。虽然自己都钟意煮嘢食，但有时候煮得多都会觉得好攰，尤其煮俾屋企人食嘅时候，因为佢哋比较食得清淡啲，变咗就只得唔几种食材系咁煮。因为我老公佢本身对食物敏感，变咗好多嘢都唔食得。如果大家见到佢肥，其实唔关我事，肥系佢自己嘅事，因为佢咩都摆落口食。”对于网民不时评击伍富桥“食软饭”，Shirley表示：“其实开头睇到呢啲批评，可能会好嬲，但而家就会好啲啰。（好似之前咁留言反击？）我系会讲粗口，哈哈。不过讲真，而家睇到就冇以前咁咁嬲，因为都明白好多嘢都控制唔到人哋讲乜，相反可能系我老公会嬲啲啰。”