TVB小花爆早年离巢真相 遭前辈闹唔识做戏：呢行饭你冇资格去食
TVB剧集《异空感应》在剧中饰演“变态恋爱脑”的丁乐锶（丁丁），凭清纯外貌加上挥洒自如的癫丧精湛演技再度备受关注，更被网民封为“赵希洛2.0”。丁丁接受《香港01》专访时衷心感谢监制王心慰给予演出机会：“真系超多谢Amy姐，我系估唔到佢系会俾一个咁好玩嘅角色俾我，同埋我知道呢个角色系由编审戴德广所写，好多谢佢咁用心为我创造呢个人物角色俾我，讲真我系未曾试过有编审咁为我写，咁所以当我返番嚟嘅时候我真系好感动。”
不得不提，入行15年，现年36岁的丁乐锶曾经出过写真集，于2009年艺训班毕业后，即凭《美女厨房》中的“美味天使”肠粉身分火速走红工作不断。不过身边开始有人对她冷嘲热讽，最终不堪压力毅然离开无线出外打工，星途只维持3年便结束。期间加盟港视参与多部剧集演出。几经波折，多年后再回巢无线，为人变得低调一直都默默拍剧，鲜有再卖弄性感。直到在剧集《杀手》中的兔女郎，才再度引起网民热议。
丁丁透露不再卖弄性感及离巢真相，原来背后与不快经历有关：“好记得完咗《美女厨房》之后，有次出席剧集宣传活动，身边系有啲人会话我：‘你使乜着到咁靓，唔需要啦，根本成个焦点都唔喺你身上，你仲乜抢人哋风头啫’。当时我听到系好唔开心，可能佢会觉得呢个角色只系一个小人物，亦只得一句对白并唔重要，但对我嚟讲并唔系，我咁做，只不过系想投入返去呢个角色度做好本份，明白到有啲人唔钟意就唔钟意。之后都会听到唔同嘅声音，例如有啲人又会话我‘唔好抢人戏’、‘有啲时候要检点啲’。同埋会有啲人会问我系咩合约，我就会话普通艺员训练班合约，佢哋就会话我‘你都唔系𠮶份约，合约唔同，变咗个焦点唔喺你度，公司要捧嘅人唔系你，你仲咩要着到咁啫’。”
她还透露曾被一位前辈开口闹：“试过同一位前辈演戏嘅时候，被对方当众开口闹，话我仲乜抢戏，又话我‘你根本唔识演戏，呢行饭你系冇资格去食，你仲好意思喺度嘅’，当我听得太多呢啲嘅说话，我开始怀疑自己，究竟系咪我有问题？当时我选择离开都系呢啲问题困扰住我，令到我觉得好攰，心谂我只不过系想拍戏做演员啫，点解会有咁多是是非非。就系呢啲经历，令到我每次出席任何活动，无论衣着装扮，我都会变得低调，因为我好怕得罪人。”
丁丁明白到演员之路并不易行，全靠信仰及家人的支持总算挨得过：“其实我妈妈一直都好支持我，因为我妈妈系TVb嘅粉丝嚟，每套戏佢都差唔多都会睇𠮶啲嚟，就算佢煮紧饭嘅时候，佢都开大部电视，一路煮饭一路听住。而且佢为人好乐观，经常都会鼓励我，又会话以前刘青云黄日华𠮶啲时代，个个都系挨出嚟呀，就会鼓励我要努力同埋叫我等下啦。相反我爸爸就唔赞成，就会问我点解唔转行，做其他行业咪仲好。记得就系听佢讲，中间离开呢行转投其他工作，点知系好唔顺利，试过有间公司系倒闭，变咗我明白到好多嘢人系控制唔到，咁所以我而家系交托俾我嘅信仰。”
发型:Leighton Salon by HAIRONE@Keino Yip